特首林鄭月娥噚日開記者會，就《逃犯條例》修訂工作做得唔好而道歉，但盲反派以至激進派似乎都「唔收貨」，話如果林鄭月娥喺聽日下午五點前仍「堅拒答允四大訴求」，佢哋就揚言會採取進一步行動，包括圍堵立法會同政府總部，並發動罷工、罷課同罷市，做法仿如最後通牒。換句話說，繼6.12、6.16暴力衝突後，聽日或者後日隨時又發生另一場包圍、衝擊甚至流血衝突，囍雨真係想講句，停一停好嗎？

警民兩敗俱傷？

今日《生果報》有篇題為〈連登仔︰明午唔覆就開拖〉嘅報道，指「積極動員網民行動的連登討論區」話聽日下午政府再唔答允訴求，佢哋就會採取「進一步行動」，而「青年新政」等八個群組又發表聯合聲明，大意都係話政府聽日下五點前無回應「撤回草案」、「收回暴動定性」等四大訴求，佢哋就會喺星期五「行動」。換句話說，盲反派、激進派以至個別人士，有可能喺聽日下午或者後日就有「行動」，隨時又起衝突。

對於有人又發起集會以至包圍行動，囍雨真係要請呢啲人三思而後行，民陣喺6月9日搞遊行，當日叫人「預演」包圍立法會，即晚就出事，出現衝擊、襲警等行動；之後6月12日再集會，暴力衝突就全面升級，警察受襲受傷，示威者都有受傷同被捕。依家佢哋又想將行動升級，係咪又想搭個台出嚟等啲年輕人去衝，然後同警察兩敗俱傷呢？

政府已作回應

當盲反派以至其他激進派分子不斷要求林鄭月娥或者政府回應所謂「四大訴求」甚至「五大訴求」嘅時候，囍雨要喺度提提大家，第一林鄭月娥已就修例引發嘅問題道歉，第二係政府已經暫緩修例，基本上都唔可能立法，第三就係警隊「一哥」盧偉聰已經講明一小部分人以暴力衝擊警方防線先涉及「暴動」，政府可以話係已經實際回應咗盲反派以至激進派；步步進逼政府，除咗可以繼續「谷」人上街之外，囍雨真係諗唔到有咩好處。

老實講，當盲反派得勢不饒人，不斷進逼、不斷要求政府呢樣、果樣嘅時候，實在令人懷疑，無論政府點樣回應，佢哋基本上都係要一反到底；但囍雨必須指出，凡事太盡，緣分誓必早盡，再推年輕人上街、抗爭，對社會無任何好處！ 

原圖: 網上截圖及RTHK