香港眾志秘書長黃之鋒因「佔中」期間違反禁制令，被控刑事藐視法庭，最終被判囚兩個月，噚日佢刑滿出獄，就即時為反《逃犯條例》修訂「發聲」， 話林鄭月娥無資格再做香港特首，仲話「好遺憾」錯過咗反修例遊行同2次「佔領」夏慤道行動，大嘆無得同香港人「並肩作戰」喎；廣男就覺得，黃之鋒啱啱先服完刑、坐完監出嚟，就好似無汲取過教訓咁，又想去參與佔領，唔通佢而家變成「慣犯」，唔發動、唔參與「違法達義」就「周自唔自在」？

聲言重返抗爭行列

黃之鋒噚日喺荔枝角收押所外，對傳媒講發表「政見」，聲稱雖然喺獄中對外界嘅事仲係唔多了解，只係透過零星嘅新聞見到，話反修例人群出現喺夏慤道，覺得好「振奮人心」，希望行動會比反國教運動「贏得更徹底」，又批評特首林鄭月娥無回應到港人訴求，仲話林鄭月娥「死蛾撐飯蓋」，要求佢落台等等；話鋒一轉，黃之鋒又同傳媒預告，會盡快重返抗爭嘅行列，當務之急係要「反送中惡法」，將會同其他「眾志」成員傾吓下一步有咩行動。一句講晒，就係要借反修例議題，繼續「搞政治」、同政府「搞對抗」。

黃之鋒惡性不改

黃之鋒犯咗刑事藐視法庭罪，之前又有一單衝擊政總案，依家先至啱啱出獄，就磨拳擦掌要再抗爭，仲話自己錯過「佔領」行動，唔通佢又想搞「違法達義」果套？ 老實講，一個人「正常人」、非慣犯俾人定完罪兼坐完監，正常都會話以後會小心、以後唔會「行差踏錯」啦；但黃之鋒就「反其道而行」，一時話錯過佔領，一時就話要盡快重返抗爭行列。言下之意，即係如果有涉嫌違法或者盲反派好鍾意講嘅「違法達義」行動，黃之鋒就即刻會仆去參加？睇嚟盲反派啲政客嘅抗爭甚至「違法達義」思潮，已經滲到入「骨」，好似唔抗爭「唔舒服」咁款。

對於黃之鋒一見傳媒就「大發牢騷」，到底係抽水定真心想「抗命」，大家自己判斷喇，但廣男要指出一點，就係「違法達義」嘅真正開始，其實係由2014年9月26日晚上，黃之鋒叫學生衝擊政府總部東翼前地揭開序幕，呢件事亦引發兩日後「啟動」長達79日嘅違法「佔中」行動；依家始作俑者黃之鋒話要出嚟「抗爭」，大家真係要「聽其言，觀其行」，睇吓佢會唔會又喺度興波作浪！

原圖: 大公報