近期見到學民搞罷課單嘢鬧到熱哄哄，廣男於是比平時多啲留意呢宗新聞啦！點知越睇就越嬲，尤其係黃之鋒嘅言行，真係睇到人眼都凸埋！早喺一、兩個禮拜前，睇新聞見到學民思潮嘅宣傳單張，廣男就覺得好唔妥，不斷講公民抗命，又講到啲學生唔抗命就無公民提名咁！成篇單張，得一面倒嘅說法，講真，如果無諗過要中學生出嚟抗命，又做咩要派呢啲單張先？

點知今朝聽黃之鋒喺電台節目，係咁話唔會叫啲未成年學生去佔領中環，吓？我有無聽錯呀？更加自相矛盾係，黃之鋒話鋒一轉，就即刻話自己未夠十八歲但會去佔領中環，吓？吓？咁即係點？即係好似同其他同學講，未成年既同學係唔應該拍拖既，不過自己雖然「未夠秤」，但一定會放膽去愛去拍拖。呢種講法究竟係咪就想SHOW俾朋輩睇，「佔中」咪「佔中」囉，駛乜驚喎？！咁即係講到底都係鼓勵緊啲未成年學生去馬去佔中囉。

查實你派單張時，又點樣分收嗰張單張嘅係成年定未成年呢？相信一間中學，絕大部分既中學生，都係未成年人士嚟架，入面中一、二、三既學生，可能得十二、三歲，廣男唔係話佢哋一定唔明白政改咩事，但有啲啱啱升上中學既學生，可能幾個月前都仲係小學生，好心就唔好將抗爭文化帶入中學校園啦！萬一佢哋出咗事，學民思潮你已講到明唔負責，咁學生同家長可以點先？

勞氣位仲有一個，黃之鋒係咁話「學生有自主權架，想罷課又得，唔想罷課去遊行又得；或者唔去遊行，齋罷課又得」，咁樣講，學生如果自主選擇唔罷課，係咪都OK先？你所講嘅自主權，係咪都包括埋唔罷課唔想政治走入學校嘅自主權先？千祈唔好搬番單張嗰啲歪理，講學生只顧著讀書想考A入大學，而認命唔企出嚟，如果你尊重自主嘅話，請你都尊重那一批唔想罷課只想專心上課嘅中學生吧！

原圖：bastillepost