日前政總、立法會外爆發暴動，起因係有不知名人士要求政府喺下午三時前撤回修例，否則就會衝擊；結果「時間一到」，個別激進示威者就開始衝擊、襲警甚至縱火，期間磚頭、鐵枝等雜物橫飛，唔少警察受傷，警察基於履行維持秩序嘅責任而回擊，亦有示威者因而受傷。成件事好清楚，就係部分示威者（有人指係暴徒）衝擊、襲警在先，警方回擊在後，但公務員事務局前局長王永平竟然稱「我只見警察打人，沒看到示威者掟磚」；廣男想指出兩點，第一係王永平「見唔到」，唔代表冇！第二點係，王永平喺呢個時候仲喺度煽風點火，係咪嫌雙方嘅矛盾、怨恨唔夠深呢？

只見警察打人　不見暴徒掟磚？

由噚日到今早，媒體以至社交平台都熱傳王永平一句「我只見警察打人，沒看到示威者掟磚」，廣男上網聽番有關嘅電台錄音，王永平講嘅說話亦都係呢個意思，原話係「雖然警方係展示左有磚頭啊、削尖鐵枝啊，但係我無見到、係畫面無見到有人使用」、「相反我見到好多片段係一班警察向手無寸鐵同無反抗的人，瘋狂地打」。一句到尾，即係想講「我只見警察打人啫，唔見有人掟磚同鐵枝」喎。

廣男必須指出，其實好多反對修例人士，都同王永平一樣態度，但係你哋見唔到，唔代表冇，廣男當日下午亦都有睇電視直播，的確係示威者掟磚、鐵枝，甚至係想將啲鐵馬成欄「車」向啲警員度，呢兩日喺網上廣泛流傳嘅電視台新聞片段，亦清楚見到有示威者掟磚。事實上，王永平言論俾人覺得有偏頗之外，佢咁樣做可以話係喺雙方關係咁緊張嘅時刻，繼續撥火、火上加油，只會激化雙方矛盾，而唔會對事情有任何幫助！

不應激化矛盾

老實講，王永平唔係一般人，而係香港特區嘅前問責官員、局長，佢評論事件應該好小心，因為好多人見到佢係前官員，聽到佢講呢番說話，好容易加劇矛盾，令民怨增加；廣男就覺得，喺呢個時候，所有理性、和平而且愛香港嘅人，都應該停一停、諗一諗，睇下點樣紓緩矛盾，防止再有下一波暴力衝突。一句講晒，這類言論，對解決當前爭拗毫無幫助，只會加深警民之間嘅仇怨，大家切勿將香港推向萬惡深淵。