喺剛過去嘅星期日，民陣發起反對《逃犯條例》修訂嘅遊行，期間叫人「預演」包圍立法會、提供「法律支援」，結果當晚就有人衝擊、襲警、意圖佔領，甚有「搭台」等示威者搞事之嫌；前日喺立法會、政總對開，好多示威者衝擊、襲警，釀成暴動，喺呢個時候，各方應該平息干戈、「埋枱傾」先啱，但民陣竟然仲想喺嚟緊星期日發起遊行、周一發動集會，囍雨真係想問民陣或者盲反派政客，係咪又想「搭台」，「集人氣」之後等人去衝，推啲年輕人去做炮灰呢？

民陣用心最毒辣

講起民陣，囍雨不得不由過去嘅周日開始講起，本來一個和平遊行，當好多人喺下晝陸續抵達遊行總點，即係政總、立法會對出之後，民陣作為主辦單位，正常都係搵人講下嘢、打下氣就結束集會，但「奇怪」嘅民陣竟然叫人唔好走，留低喺度「預演」包圍立法會，之後到大約傍晚時分，民陣就同人講會向被捕人士提供「法律支援」。直到夜晚十點，民陣宣布遊行結束，之後政府發表聲明回應遊行，再隔一陣就開始有人衝擊、襲警。整個衝擊事件，好似唔關民陣事咁，但如果你問囍雨，囍雨就覺得係民陣搭咗個台出嚟，聚眾咗大批人潮之後，啲人衝唔衝，就「閣下自理」、各安天命喇！

經過星期日嘅遊行、前日嘅大型暴動，稍為有理性嘅人都知道，如果喺呢個時候再鼓動市民上街，最可能出現嘅結果，就係再爆發騷亂，甚至爆發更大型嘅暴動，暴力只會越來越升級，到時只會有更多警察受到傷害，而企喺「衝擊最前線」嘅青年、學生，亦無可避免地受傷甚至被捕，民陣喺呢個充滿風雨飄搖嘅時候再發動遊行、集會，實在不明智。

反對派政客在哪兒？

當大家喺電視甚至現場見到好多人衝擊、襲警嘅時候，囍雨真係好好奇，到底民陣啲領導層、包括民陣召集人岑子杰到底喺邊？係咪民陣或者盲反派政客搭好晒台，然後就搵個「安全地方」，任由啲年輕人去衝、去做炮灰？囍雨喺度必須點出一個現實，就係民陣骨幹成員、盲反派議員非常「潔身自愛」，佢哋唔會自已衝，但佢哋極可能好想其他人去衝，大家喺嚮應呢啲政客呼籲嘅時候，不妨諗一諗點解喺呢個風高浪急嘅時刻，啲政客仲要煽動大家出嚟？七一就到，年尾又有區議會選舉，個別激進人士、年輕人越多去衝、越多被捕，對邊個最有利？ 

原圖:RTHK