盲反派係「電影製作」高手，將《逃犯條例》修訂講到好似上網發表下言論都會俾人「捉番大陸」咁，之後搞遊行、罷市、罷工同罷課，一輪「攻勢」之後，就話要搞集會、包圍立法會，結果搞到立法會、政總外出現一幕幕暴力衝擊場面，情況一發不可收拾，更演變成暴動。喺呢個情況底下，盲反派政客應該「收手」，唔好再搞咩行動谷啲人上街，偏偏教協喺呢個時候宣布要搞「全港罷課」，囍雨真係想問下教協，係咪想谷晒所有教師加學生上街，等佢哋去衝、去俾人拉呢？

教協居心叵測

教協前幾日號召罷課，已經俾人感覺佢哋係借機谷人上街，將教師甚至學生置於風險之中；佢哋噚日再高調宣布要發動「全港性」罷課，囍雨真係想講句，教協係咪想谷晒啲教師上街、抗爭，然後天下大亂先安樂呢？

囍雨必須要講句，今次反修例行動，唔同以往嘅七一、元旦遊行，因為激進派已經講明係「以死相搏」、「寧化飛灰」，甚至稱如果有人死咗會對政府「不利」，喺呢個風頭火勢，教協仲發動「全港罷課」，可以預想到，更多嘅教師、學生上街，更多學生走去前線衝，一旦發生衝突，然後更多警察、學生受傷，呢個係咪教協想見到嘅結果？如果唔係，做咩要喺呢啲時候叫罷課，囍雨真係諗唔明！

值得大家留意下嘅係，教協以至教育界議員葉建源叫人罷課，或者葉建源叫年青人「照顧自身安全」，但佢哋永遠唔會自己去「前線」，點解？佢哋搭好個台，去唔去示威或者衝，家長或者學生自己「決定」，有起事上嚟，反正都係學生嘅事，因為呢班所謂教育界人士，又冇講明叫人去衝，又聲稱鼓吹「和平理性」，真係乜都「唔關佢哋事」。

將學生捲入政治衝突

之前有盲反派政客同支持者喺學校發起聯署反修例，囍雨覺得已經係將政治帶入校園；今次佢哋搞罷課，間接推教師、學生上街，更加係將學生帶入政治衝突，用心非常唔好！囍雨喺度呼籲，教師應該繼續盡好教師本分，留喺學校照顧學生，而學生正值考試時間，更好唔應該為咗嚮應政客而「走出嚟」；至於其他市民大眾，就梗係要譴責教協啦！