盲反派為反《逃犯條例》修訂，不惜周圍去「告洋狀」，並「成功」將問題變成「國際焦點」；日前，美國眾議院議長佩洛西就發聲明，話支持週日（9日）嘅反修例遊行示威者，將修例形容成洪水猛獸，抹黑中國破壞「一國兩制」同香港法治，仲話一旦通過，會危及留港美國人的安全，可能要重新檢視雙方關係云云。廣男就話，喺呢個中美關係緊張時間，高調插手香港嘅事，擺到明有古怪，分分鐘有可能係為日後「搞香港」而鋪定路，香港班盲反派咁配合美國「步伐」，香港人真係多得佢哋唔少！

美政客向港府施壓

佩洛西發聲明，話要幫「勇敢嘅示威者」發聲，強調美國企喺香港人嗰邊，反對可怕（horrific）嘅《逃犯條例》修訂喎，仲話立法會喺中國控制下提出修訂，展示咗北京肆無忌憚地踐踏法律，壓制異見、抹殺香港人自由嘅一面，聲稱修例通過後，中方會將非法綁架嘅行為「合法化」，威脅到留港8.5萬名美國人嘅安全；佢又話修例危害咗美國同香港超過二十年嘅緊密關係，威脅港府如果法例通過咗，就要重新評估下香港喺「一國兩制」框架下，有無「充份自治」，仲講到明期待《香港人權與民主法案》提出，表明係對港府官員打壓民主嘅懲罰機制，佩洛西嘅講法，係咪要脅逼港府？

口頭上支持　實際上卻相反

廣男認為，週日嘅反修例遊行，的確大部分示威者都係和平表達訴求，但唔好忘記喺入夜後，小部分示威者包圍立法會、佔據夏慤道、暴力衝擊警方防線嘅行為（事情發展到噚日，衝擊、襲警行為就更恐怖！），廣男唔明白，點解佩洛西要讚揚「暴力示威」，而唔係譴責暴行呢？仲有，佩洛西所講嘅「中國綁架論」，係咪想講喺修例後中國可以隨時引渡任何人到內地呢？如果係嘅話，擺明就不符事實！更重要嘅係，佩洛西聲稱一旦通過修例，就要重新評估雙方嘅關係，講到底，係咪想威脅港府、暗示會制裁香港，迫政府讓步撤退修例？如果美國係基於不實嘅指控，或者基於聽信香港盲反派政客而要「搞香港」，廣男覺得美國根本係借機生事，甚至係想「劍指」中央！

一眾外國政客樂此不疲，接二連三為《逃犯條例》修訂「發聲」，如果大家留意到問題嘅核心，就係話我哋嘅中央政府、中國法治，甚至指控中方破壞「一國兩制」、干預香港司法；但大家諗一諗，由政府建議、立法，以至第時立法後嘅一切程序，都由港府、法庭主導，點會破壞「一國兩制」？而家正值中美貿易戰，國際關係非常緊張，當外國政客好似「好關心」香港嘅時候，大家要明白，佢哋背後其實係「另有陰謀」嘅！

原圖: 中通社