立法會聽日恢復二讀《逃犯條例》修訂草案，但盲反派陣營繼日前發起反修例遊行之後，民陣又針對聽日嘅會議，發起包圍立法會行動，藉此向特區政府及建制派施壓。囍雨就發覺，除咗民陣之外，由噚晚開始，已經有個別組織喺社交平台號召提前於今晚圍堵立法會，仲出現「以死相搏」等激進字眼，網上亦出現製造武器、攻擊警察等教學。囍雨認為，種種跡象都令人懷疑，呢啲組織發起嘅所謂「留守、集會」行動，好有可能唔係和平集會，而係醞釀緊一次大型違法暴力衝擊，大家實在有必要高度警惕，表達各種意願都要和平合法。

由網上流傳嘅圖片可見，呢班人嘅目標係要號召五萬人「徹夜留守包圍立法會」，行動時間就預定為今晚11點，圖片仲寫有「全民皆兵，以死相搏」、「面對極權，繼續和平理性只會淪為笑話」、「以武制暴」以及「洋紫荊革命」等激進字眼。好明顯，號召者已經講到明唔會係「和平理性」嘅方式。囍雨覺得，更加令人擔心嘅係，呢啲字眼同部分激進港獨勢力嘅表述「高度一致」，如果真係呢班人喺背後搞事，囍雨有理由相信，佢哋嘅目的絕對唔止「反修例」咁簡單，而極有可能係以暴力衝擊形式進行嘅反政府行動。

以自製「汽油彈」襲警？

事實上，囍雨今日睇到已經有媒體報道，一小撮「港獨」暴徒正部署緊喺12日凌晨開始，兵分多路展開衝擊立法會甚至政總嘅行動，更有「指揮者」策劃以自製「汽油彈」、「油漆彈」以及俗稱「牙籤弓弩」嘅小型弓弩襲擊警察。而喺日前嘅衝擊事件中，警方亦都喺現場搜出好多諸如刀片、較剪、長矛等攻擊性武器。囍雨覺得，大家好應該睇清楚，當絕大部分市民都以和平方式表達訴求、特區政府亦都作出正面回應時，絕對唔可以忽視有一小部分滋事者要趁機搞事，以暴力嘅方式製造混亂甚至流血衝突，呢啲絕對唔係香港社會可以容忍嘅違法行為。

年青人切勿以身試法

故此，囍雨喺度要呼籲廣大市民、尤其係年輕人，千奇唔好聽信一班別有用心嘅滋事者甚至係暴徒所謂「守護香港」「為香港好」之類嘅煽惑之詞。睇番日前喺衝擊事件中被警方拘捕嘅，基本上都係18至35嘅年輕人，點解被捕嘅都係年輕人，仲要唔見有咩盲反派政客被捕？大家都有參加集會、和平表達訴求嘅權利，但係表達訴求，唔代表可以使用暴力及違法，社會各方人士尤其係年輕人，要小心，唔好畀人利用，否則只怕一失足成千古恨。

原圖：網絡