噚日嘅反修例遊行及夜晚嘅集會結束之後，竟然有一班所謂嘅「示威人士」喺立法會外一帶非法集結，至凌晨更企圖衝入立法會大樓，與警方爆發激烈衝突。相信廣大市民由電視畫面都可以清楚見到，呢班人喺現場大肆毀壞，多次暴力衝擊警方防線，擲鐵枝、掟鐵欄、毆打警察導致多名警員受傷；另一方面，部分人士又企圖衝出主要幹道，以鐵馬、雜物阻塞行車線。囍雨有理由相信，佢哋絕不是以「表達訴求」為目的，根本就係要趁機搞事、有意製造混亂，甚至企圖佔領。對於呢種目無法紀嘅暴力行徑，社會各界應該強烈譴責，同時支持警方依法追究到底！

十幾人圍毆警察

根據電視畫面及傳媒報道，凌晨十二點左右，大批戴口罩嘅示威者拆毀立法會車閘出入口，衝向立法會大樓方向，當警方嘗試驅散人群，呢班人又築起人鏈、架起鐵馬，向警方防線步步進逼。混亂期間，有警員受傷血流披面，但仍有示威者用鐵枝扔向該警員擊中其頭部；另有一名警員被襲擊倒地後，十幾名示威者蜂擁而上將其按喺地下圍毆、拳打腳踢；部分人又不斷以鐵馬、鐵欄作為武器擲向警察。當警方出動防暴警察後，示威者又將「戰線」轉至龍和道、添馬公園以至灣仔一帶，繼續以大型雜物堵塞道路、進行破壞，更一度令告士打道東行線癱瘓。可見，呢班示威者嘅目的十分明確，就係破壞、襲警、佔領，完全係暴徒所為！

搜出長矛狀武器

囍雨想提醒大家特別留意嘅係，呢班激進暴力分子喺衝擊過程中，唔少人都戴住口罩眼罩，明顯就係為咗避免被認出、以便犯事後逃避責任。更嚴重嘅係，警方成功清場後，喺唔少示威者身上都搜出刀片、萬用刀、較剪等具攻擊性高危物件。及至今日，執法人員又喺示威現場搜出大量安裝鐵釘等利器嘅「長矛」狀武器。囍雨認為，呢樣係一個值得高度警惕嘅訊號，即係香港社會現時確有一班激進、崇尚暴力嘅年輕人，有組織有預謀咁公然違法、蓄意破壞，甚至有意製造流血衝突。至於呢班人有何政治訴求不得而知，但幾可肯定嘅係，每當社會有爭拗、或者遊行示威事件，呢班人就會趁機搞事，大肆暴力破壞。

囍雨必須指出，經過今次事件，香港社會各界必須再一次企硬、對暴力事件說「不」！社會大眾、人人都有責任傳遞一個清晰嘅信息，就係香港係一個法治社會，絕不容忍任何人以暴力違法行為嚟表達訴求。同時，大家都應該支持警方依法追究，將暴徒繩之以法。而對於今次遊行係要反對政府修訂《逃犯條例》，囍雨就想提醒大家唔好忘記，今次修例嘅原意，就係要以法理基礎去處理台灣殺人案、彰顯公義，同時要堵塞存在多年嘅法律漏洞，大家實在有必要以理性嘅態度去看待、分析，唔好俾盲反派所誤導。

原圖：大公、文匯