盲反派反對修訂《逃犯條例》嘅招數可謂日日新鮮，不過佢哋「貫徹始終」嘅伎倆就係兩個字：「靠嚇」。廣男見到，盲反派喉舌、壹傳媒創辦人黎智英喺接受美國CNN專訪時聲稱，修例如同令香港「打開地獄之門」、甚至話「30年前發生喺天安門廣場嘅事情，今後可能隨時於香港發生」。廣男真係唔明，修訂《逃犯條例》關「六四」咩事呢？何況，一條正正為咗打擊嚴重犯罪、追截逃犯嘅法例，點解又會令香港變「地獄之門」呢？黎智英係想香港做「逃犯天堂」？

根據媒體報道，黎智英喺專訪裡面講到，一旦通過修例，「等於宣告香港嘅自由、法治來到終結」、「內地隨時可捏造罪名，誣陷傳媒人，令其關進內地監獄」；又形容修例「令香港淪為地獄，法治一旦受損，香港金融中心嘅地位亦會隨即崩壞，因公眾對制度失去信心」云云。廣男就真係唔明，黎智英有何理據得出咁嘅結論，但相信大家都已經逐漸明白到，修例係為咗堵塞法律漏洞、而且正正係令法治更加健全嘅表現，何來「法治來到終結」呢？相反，如果好似黎智英以至盲反派政客咁，明知有漏洞仲要反對去堵塞，咁先至係對香港法治最大嘅傷害。

引渡好隨便、好容易？

至於黎智英提到「內地隨時可捏造罪名，誣陷傳媒人」嘅講法，廣男覺得明顯就係想營造「修例後可以隨便拉人」、「修例打壓新聞自由」之類嘅恐懼，但呢啲講法根本屬於無中生有、完全與事實不符。事實上，當港府最新提出「只處理由中央機構提出嘅引渡請求」時，至少已經傳遞咗兩個明確信息：一係修例要針對嘅，係真正嚴重、甚至需要國家層面介入嘅重大案件；二係任何其他機構、部門，都無權提出引渡申請。更重要嘅係，任何移交申請都有香港法庭把關，而傳媒人工作無可能成為移交理由（雙重犯罪保障），黎智英所謂「捏造罪名」，根本就無可能。

日復一日 製造恐懼

廣男真係懷疑，黎智英又好、盲反派政客又好，佢哋反對修例根本唔係出於對法律條文或者操作程序嘅關注，而係想靠日復一日嘅製造恐懼去不斷煽動「仇共反中」情緒，從而「谷」人上街、搞對抗、反政府，咁先至可以達到佢哋反中亂港嘅目的。廣男想提醒大家，修訂《逃犯條例》唔會令香港「變地獄」，相反任由呢班居心叵測嘅政客咁搞落去，就肯定對香港非常不利！

原圖：圈傳媒