當港府對修訂《逃犯條例》加入更多保障、將道理逐漸闡明時，社會上仲有唔少人不斷發表錯誤見解、甚至妖魔化修例，究竟係佢哋對修例了不足，定係有人誤導佢哋、製造恐懼呢？囍雨見到《生果報》今日報道，香港有好多教師都反對修例，一時話擔心以後做學術研究都可能隨時「踩地雷」，一時又話多咗「白色恐懼」。囍雨真係要講，修例對做學術研究根本冇影響，就算喺研究裡面對其他地方或者內地嘅政府提出意見、批評，根本就唔會「因言入罪」、受《逃犯條例》修訂影響，所謂「白色恐懼」嘅講法更加無根據、唔成立！

《生果報》報道，依家已經有超過1.3萬名香港教育界人士聯署反修例，其中進步教師同盟成員陳智聰就聲稱，修例令「香港價值受到損害」，亦令人質疑「香港是否已變成一國一制」，「好擔心香港仲有無免於恐懼嘅自由」、「依家係多咗層白色恐怖」咁款；學術自由學者聯盟發起人何芝君就講到，「喺一黨專政之下，對無論教學或者學術研究，都設置咗好大嘅地雷俾我哋踩」云云。睇真啲，呢啲講法又係同盲反派政客嘅論調「高度相似」，但事實又係咪咁呢？

學術、言論等自由從未受影響

囍雨想大家留意，當港府最新提出，將「可移交」嘅刑期由原本嘅三年或以上提升至至少七年、只處理由中央機關提出嘅引渡要求等建議，正正反映咗修例係要針對真正嚴重嘅罪行同埋一啲跨境犯罪；而且，仲要滿足「雙重犯罪」呢個原則，即係話，所犯罪行同樣要喺香港都屬於犯法，先有可能被移交。一直以嚟，「學術自由、言論自由」喺香港根本就受到法律保障，政府亦都從來唔會「以言入罪」，呢啲教師又點會受到《逃犯條例》修訂影響呢？況且，香港人嘅各種自由從來都冇受過影響，亦唔會因修例而改變，何來「白色恐懼」？

立法執法 皆在「一國兩制」框架內

至於「一國一制」嘅講法就更加有問題。事實上，此番修例，由立法過程以至通過修例之後嘅執法，全部都係喺「一國兩制」框架之下進行；而且，完成修例之後，將來處理每一宗移交案件，都仲要經過奉行司法獨立嘅香港法庭進行審理，絕對唔係好似呢啲「教育界人士」所講嘅 「一國一制」。囍雨一向都覺得，對修例有疑惑唔出奇，提出疑慮亦都好正常，但如果係為咗盲從盲反派，而存心搞抹黑，甚至為咗搞對抗而故意製造恐懼、「谷」人上街，咁就真係好唔要得。

囍雨想講，最大嘅「恐懼」，正正係別有用心之人故意製造嘅恐懼。更何況，從教育界嘅角度，更應該向社會負起「解惑」嘅責任，而唔係「煽惑」。

原圖：RTHK