盲反派喉舌《生果報》，近日大肆報道反修訂《逃犯條例》聯署嘅消息，日日「數人頭」、「數參與聯署嘅學校名單」，壯大反修例行動嘅聲勢，但係「聯署」似乎喺另一邊廂引起唔少爭議，先有校長澄清聯署唔代表校方立場、又有人發現自己「被冒簽」，今日仲有報道列出「六大茅招」，包括聯署「發水」、「偽造民意」等等。到底呢場所謂「學界反修例聯署」係咪可信？有冇代表性？囍雨就覺得，當一場聯署行動，不斷爆出「造假」醜聞，某啲傳媒日日爭住報道、「數人頭」，都唔知好嬲定好笑！

聯署的「六大茅招」

今日，有傳媒分析就「聯署」共有「六大茅招」，包括盲反派政客（如「公民聯合行動」核心人物何芝君、公民黨主席梁家傑和立法會議員涂謹申等人）發起嘅聯署就扮成「民間自發」；冒用他人名義參與聯署，被「冒簽」嘅受害者就包括立法會議員張國鈞和香港精神健康促進會主席陳仲謀等；又填寫虛構個人資料、胡亂簽名、重複簽名、甚至「盜用」學校名義等等，差唔多諗得出嘅問題都有。

囍雨認為，聯署本來係表達民意嘅重要渠道，代表不同人士、界別的意見，但反修例聯署以學校名義發起，又話唔代表校方立場；以為啲人係真簽名，但當中又有好多簽名係「混水摸魚」。老實講，如果個別人士有心簽名，又點會個名叫「特朗普」呢？又或者，有咩香港人、香港學生或者老師個名係叫「ABCDE」㗎？如果一個聯署係建基於唔少假簽名、冒簽嘅基礎上，仲要校方表明聯署唔代表校方立場，囍雨覺得呢個充其量叫「個別人士且不知真假的聯署」，講到代表學界、某學校就未免太過冠冕堂皇喇！

讓校園遠離政治

老實講，校園本應係學習知識嘅寧靜之地，部分立心不良嘅政客，將《逃犯條例》例訂爭議帶到學界，騎劫「學校」和師生作政治表態，甚至有「港獨」組織借機煽動學生參與「抗爭」，如果再放任唔同政治勢力繼續入侵校園，會唔會出現第二次「佔中」、「旺角暴動」，都尚未可知。囍雨喺度要提下大家，當年「佔中」前，都係因為有學生組織發起罷課，之後叫學生衝擊政總，先會引發「佔中」，歷史會唔會重演，就睇大家有冇認清政客嘅「真面目」。

原圖:大公報