囍雨有時真係唔明，港府提出嘅修訂《逃犯條例》建議，究竟有無咁難理解呢？噚日睇新聞見到，為咗反對港府修例，英國外相同加拿大外長就聯合發表「聲明」、美國商會就提出「八大疑問」，但綜觀佢哋嘅論調同「疑慮」，其實都就唔成立，甚至有違常理。例如英、加官員講到修例會影響「自由同權利」（rights and freedoms），損害香港營商信心、國際聲譽；美國商會就話擔心修例影響新聞、言論自由等等，但市民嘅「自由同權利」同係咪可以犯法後逃之夭夭，好似係兩件事嚟喎！況且，一個堵塞法律漏洞、打擊犯罪嘅法例，又點會損害營商信心、國際聲譽呢？唔通香港要變「逃犯天堂」先至保得住「國際聲譽」？

唔識分逃犯和市民？

據報道，英國外相侯俊偉（Jeremy Hunt）同加拿大外長方慧蘭（Chrystia Freeland）喺佢哋嘅「聯合聲明」裡面聲稱，「關注修例對香港營商信心、國際聲譽，以及在香港大量英、加國民嘅潛在影響」，又認為修例會對《中英聯合聲明》所保障嘅自由、權利「有負面影響」；美國商會所提嘅「八大疑問」就仲奇特，一時問香港罪案率咁低，點解仲要「甘願冒賠上法治聲譽的風險」進行修例，一時又問到修例如何可以保障香港嘅新聞、言論自由，甚至似乎連「逃犯同普通本地市民如何區分」都要問，難道美國商會連市民同逃犯都唔識區分？

有漏洞唔使理？

囍雨想講，其實香港嘅營商信心同國際聲譽，除咗有營商政策保障之外，另一個重要原因，正正係因為香港有先進嘅司法制度同法律保障，如果英、美等政客認為，營商環境要包括「包庇」罪犯，呢種營商信心或者國際聲譽，囍雨真係唔識理解。另一方面，「罪案率低」唔代表可以明知有漏洞，而唔去堵塞啊嘛！囍雨覺得正正因為香港法律健全、完善，先至會令大家對香港社會更有信心，而如果連逃犯方面嘅漏洞都堵塞埋，咁就更加好喇！

至於香港嘅新聞、言論自由，本身就受到《基本法》嘅保障，同修訂《逃犯條例》根本無關。囍雨真係唔理白，點解一個可以將重罪逃犯繩之於法嘅法例，會損害新聞、言論自由？其實，當囍雨睇到呢啲所謂嘅「憂慮、疑問」，真係發覺，外國商會好、官員又好，似乎對港府嘅修例建議仲係有好多誤解。而背後嘅原因，究竟係基於佢哋真切了解咗修例嘅利弊，定係聽咗盲反派嘅一己之見，先會有咁多誤解呢？定係呢啲外國政客背後另有圖謀？呢樣嘢就真係靠大家自己去思考啦！不過囍雨要講嘅係，毫無疑問，香港的確係有一班到處抹黑修例嘅政客，佢哋係幫香港定係害緊香港，大家心照啦！

原圖：文匯報