近年民主黨醜聞不絕，成員要犯法嘅有犯法，要呃人嘅有呃人。今日廣男睇新聞，又睇到一單民主黨「呃人事件簿」，事緣盲反派近期將反對《逃犯條例》修訂嘅宣傳品「貼通街」，其中民主黨社區主任梁翊婷就拍住黨主席胡志偉出橫額，但佢嘅Title就由社區主任升Level變咗區議員，畀人質疑佢假冒議員，甚至有法律界人士指出佢涉嫌蓄意假冒公職人員。講真，呃人已經衰架喇，而家仲可能涉嫌違法，民主黨今次又會唔會行出嚟交代清楚同公開道歉呢？

冒充公職人員屬違法

近日，有觀塘區街坊發現梁翊婷同黨主席胡志偉「孖頭」出橫額，內容係關於「要求撤回修訂引渡條例」嘅，但成條橫額最「吸睛」嘅地方，係在於條橫額寫住梁翊婷「區議員」，即係選舉都未到，梁翊婷就由社區主任「自動升格」為「區議員」，大有冒充、誤導嘅成分，條橫額一直掛喺街，直至有傳媒去梁翊婷嘅辦事處查詢，條橫額就「悄悄地」消失，而梁翊婷或者有關嘅民主黨辦事處職員就聲稱係「印刷出錯」，大家信唔信民主黨？反正廣男就唔相信喇！

社區主任變「區議員」，第一個最嚴重嘅問題，肯定就係咁就可能犯法，因為根據香港法例，冒充公職人員係犯法㗎，如果被定罪，分分鐘監都有得坐，民主黨一句「印刷出錯」就了事，會唔會兒戲咗啲呢？廣男讀書、做嘢時都處理過一啲印出街嘅宣傳品，自己人打錯字、用錯字甚至「有心錯」都見過，但就從未聽過「印刷錯」，就等於你將印有「民主黨專呃人」嘅宣傳品設計檔案交畀人去印，個宣傳品出到嚟好難印錯咗變成「民主黨專幫人」囉。

民主黨屢呃人 無道德

除咗法律問題，同樣重要嘅當然係道德問題啦，梁翊婷明明只係社區主任，如果印出街嘅宣傳品話畀人聽自己係區議員，係咪想欺騙、誤導居民先？選舉都未到，社區主任「自動當選」做咗區議員咁得意呀？唔好玩啦！

老實講，民主黨近年堅係劣績斑斑，最資深立法會議員涂謹申就喺立法會扮「委員會主席」，成員林子健就開記招、報警扮畀內地人員擄走，另一立法會議員許智峯就明明犯法都扮到「伸張正義」咁款。睇嚟「人格卑劣，毫無政治道德」呢句說話，唔單止適用於佢哋嘅立法會議員林卓廷，直頭適用於成個民主黨呀！