大約一年多前，民主黨搞黨慶邀請特首林鄭月娥出席，當時林鄭月娥賞面之餘仲捐錢畀民主黨，感覺佢哋好似好Friend咁；但到近期，民主黨就「變臉」，黨慶唔請林鄭月娥，黨主席兼立法會議員胡志偉喺立法會用極具侮辱性嘅言論鬧林鄭月娥，另一立法會議員尹兆堅又喺立法會對林鄭月娥提出不信任動議，一時之間變到好激咁款，民主黨究竟搞啲咩？係咪因為年尾係選舉，所以佢哋就要瘋狂做Show呢？

尹兆堅噚日就喺立法會對林鄭月娥提出不信任動議，發言時稱林鄭月娥破壞「一國兩制」、「拆毁」香港法治制度，仲話港人被「送到」內地審訊，可能會被「滅聲」等等。一句講晒，尹兆堅以至民主黨就係將啲嘢講到好恐怖咁，繼而將所有嘢入晒林鄭月娥數！

選舉前要做政治騷

問題就嚟喇，點解明明一年前民主黨同林鄭月娥都仲叫做Friend底，事隔一年就唔同晒呢？廣男就覺得，當中原因極有可能因為今年係選舉年，民主黨要「做嘢」喇。大家諗下，民主黨之所以仲稱得上為「民主派」第一大黨，係因為佢哋立法會議席係最多嘅，而佢哋喺五大區各保一個立法會議席另加兩席「超級區議會」議席，多多少少都係因為佢哋有一定數量嘅區議員同社區主任，如果佢哋而家唔做多啲嘢，為年尾區選「助攻」，保住地區實力，以後仲點喺盲反派入面「稱王稱霸」呢？所以見到民主黨近期越做越激，絕對係事出有因。

民主黨呢種做騷情況，除咗喺胡志偉、尹兆堅身上睇到之外，其實其他民主黨人做法亦都係「大同小異」；好似佢哋嘅立法會議員兼北區區議員林卓廷咁，2015年就已經選到石湖墟選區嘅區議員喇，但曾經話要「做返好上水」嘅林卓廷，似乎一直都搞唔掂區內水貨客問題，搞到唔少人都猛烈批評佢；喺被詬病「不作為」嘅情況下，林卓廷喺2019年年頭終於搞咗個「反水貨客」遊行，即係由當選果年，直到下一個選舉年，林卓廷先走出嚟搞「大龍鳳」，大家話幾有「誠意」呢？民主黨呢種選舉年「好勤力」嘅做法Work唔Work，廣男真係唔清楚，不過大家觀察多幾個月，就會知結果架喇！

原圖:RTHK