盲反派喉舌媒體《生果報》，噚日嘅頭版有篇「好得人驚」嘅報道，內容係話原全國政協常委陳永棋旗下公司嘅高層，因為稅務問題被內地海關拉咗，要繳付二千幾萬保釋金先放人；報道仲搵埋本身係律師嘅民主黨前主席何俊仁幫口，聲稱一旦修訂《逃犯條例》通過咗，「內地隨時可用逃稅名義引渡港商，甚至變成公開勒索手段」。嘩，好得人驚呀，如果係真的話！事實係，陳永棋今日已經公開回應話「根本冇呢件事」，更直斥報道係抹黑。而更好笑嘅係，稅務問題根本就已經唔屬於《逃犯條例》內嘅「可移交罪項」 ，何律師係冇「溫書」，定係靠嚇谷人數上街先？

新聞靠想像？

其實，只要大家見到呢個頭版頭條，喺搶眼處寫住「送中高危族」幾個字，相信已經明白又係講反對修例。內容呢，囍雨就唔詳述喇，有興趣大家自己去睇睇啦，不過囍雨想提醒大家，《生果報》所「描述」嘅好多內容，根本完全唔合乎新聞原則，簡單而言就係全無道德可言；首先，最簡單問一句，《生果報》有去搵當事人陳永棋求證架嘛，陳永棋否認咗，而陳永棋所屬公司高層亦實牙實齒去否認件事，《生果報》根本就冇實質證據去支持自己個報道，咁點解佢哋仲夾硬要將呢個不能查證嘅消息擺喺頭版呢？到底係《生果報》別有用心，所以明知報道係假都要出，定係佢哋只係一時「唔小心」登咗出嚟呢？大家都係自行研究比較好，囍雨就唔多口講住。

「稅務問題」不在移交名單內

至於搵到何俊仁「粉墨登場」呢段就仲好笑。本身搵第三方專家意見呢，其實亦係新聞嘅基本，只不過係，政府一早已經接受商界建議，將條例中列出嘅九項商業罪行由「可移交罪項」名單裡面剔除，其中正正包括破產、與公司有關、與課稅及關稅有關嘅罪行。換言之，即使《生果報》報道屬實，陳永棋間公司真係涉及「稅務問題」，咁根本就唔屬於「可移交」，何來「送中高危」呢？而何俊仁所講嘅「內地隨時可用逃稅名義引渡港商」就更加子虛烏有。囍雨真係要講一句，亂噏當秘笈，茅唔茅啲啊？！

原圖：蘋果日報Facebook