中國電訊設備商華為畀美國打壓，美國總統特朗普講到明可以將問題放喺中美貿易談判桌上傾，政治打壓昭然若揭！近日，有個別名人先後表示支持華為，但就畀反對派支持者質疑佢哋「支持華為，但用iPhone」，仲藉以「恥笑」一番；吓？有乜咁好笑呀？兩者根本冇衝突，支持華為、反對美國無理打壓，呢個係公義所在，同用乜電話根本無關，拎呢啲嚟講，只係證明嗰班人理屈詞窮。

華為為何被打壓？

明明華為只係一間中國電訊設備商，點解要受到美國全力「封殺」？當中原因好簡單，就係因為華為嘅5G技術領先全球，當中更包括所謂嘅科技大國美國；向來「也文也武」嘅美國，講技術不及華為，當然就要出茅招啦，接連「出招」強迫美國公司暫停同華為合作，更將華為手機排除於Android、Wifi甚至藍芽系統，誓要置華為「於死地」。

喺呢個脈絡之下，內地、香港相繼有名人表示支持華為，甚至買華為手機，都絕不為過。奇怪嘅係，網民嘅重點似乎都擺喺呢啲名人用咩手機上面，質疑佢哋如果支持華為，做咩自己要用iPhone，講到兩者必然係有衝突咁；兩者其實沒有衝突，因為支持華為或者買華為手機，係基於華為被無理打壓，無論係呢啲名人口頭支持華為、買華為手機都好，都無話佢哋本身一定唔可以用其他電話㗎喎，就如同華為創辦人任正非所言，愛國唔一定要用華為，佢家人而家都用緊iPhone嘅道理一樣。

「笑」對不公義？

以上事件驟眼睇似係「笑話一則」，但囍雨就覺得背後啟示實在令人覺得可悲，自己國家嘅手機商、電訊設備商受到外國無理打壓，唔少網民對呢樣嘢好似無乜感覺咁，反而不斷去針對發聲支持華為嘅名人；諗深一層，恥笑人去支持華為嘅，大都係反中反華之流，佢哋成日批評香港、批評國家，講到香港好似真係亂世、美國又好似天堂咁，套用佢哋個邏輯（強調係佢哋邏輯），佢哋做乜仲留喺香港？學黃台仰咁，走晒去外國做難民咪好囉 (嗱，為免被人斷章取義，重申一次，係套用反對派支持者邏輯！)。

原圖:大公報