民主黨立法會議員許智峯因「搶手機案」被裁定三項罪名成立之後，囍雨噚日就見到，許智峯喺佢個Facebook上載咗一篇《我向法官的陳詞》全文，估計係佢喺結案陳詞階段向裁判官所講嘅嘢。簡單嚟講，就係一邊鬧政府「公然違法」，一邊粉飾自己嘅違法行為，講到自己嘅目的係要改變「不公的制度」、搶嘢「好有道理」咁款。囍雨就真係接受唔到呢啲歪理，如果個個都認為自己有理由就可以去搶嘢、甚至襲擊，仲成世界嘅？睇嚟許智峯真係死唔認錯、死不悔改！唔怪得連個法官都要明確指出許智峯無悔意啦。

許智峯喺佢嘅《陳詞》裡面一開始就提出，希望法官可以從一個議員嘅角度去睇番成件事，又話自己作為議員，就算行為不能被法庭、公眾所接受，但只有一個「單純」嘅目的，就係「為不公的制度帶來改變」；佢仲反問「我們是否就不可在非暴力嘅原則下，超越一點點嘅所謂社會規範，去抵擋、去反抗呢？」，又聲稱喺一個議員嘅角度睇事情，應該係超越「合法必是對、非法必是錯」嘅簡單邏輯云云。囍雨實在忍唔住要反問一句，許智峯係咪想講，身為議員就有「非法也是對」嘅特權呢？公眾又會唔會接受咁嘅歪理？

有理由就可以搶嘢、襲擊？

囍雨就無興趣去研究咩叫「超越一點點嘅所謂社會規範去抵擋、去反抗」，不過就好清楚許智峯所干犯嘅係「普通襲擊、阻礙公職人員執行公務及不誠實取用電腦」三項罪行，而且係罪名成立。相信喺公眾嘅正常認知裡面，無一種「社會規範」會認為，搶嘢、襲擊都只係「超越一點點」，更加唔會認同以違法嘅行為去達致自己嘅目的，係一件「合理」嘅事。試問，如果個個都話自己做犯法嘅嘢係有理由，咁呢個社會仲有咩「規範」可言？

面臨判刑 又諗起議員職責？

許智峯口口聲聲話自己「身為議員」，就更加應該明白，議員嘅一言一行，都受到社會大眾嘅監督，而唔係代表自己有違法嘅特權；任何人犯咗法，就應該負上相應嘅責任，包括面對監獄刑期。不過，許智峯喺佢嘅「陳詞」裡面，臨尾仲話希望法官考慮畀佢可以繼續出席審議修訂《逃犯條例》嘅會議，囍雨就覺得真係幾好笑，一班盲反派平時就喺議會裡面搗亂、搞衝擊，甚至不惜違法，下下等到罪成、面臨坐監，就突然又諗起要「履行議員職責」。囍雨想講，如果法官判一個人監禁，就係要以限制人身自由嘅方式去規範行為、希望犯事者反省改過，仲點畀你去開會？許智峯如果真心想履行職務、唔想「失自由」，最好嘅方法，就係唔好犯法！

原圖：大公報