近年，盲反派以至盲反派媒體好鍾意製造一套「論述」，就係香港環境「非常唔好」，好多人移民、移民台灣人數「急升」等等，令人覺得香港就嚟係「末日」咁；今日廣男睇新聞，就見到《生果報》有篇報道題為〈送中例逼近 移民人數反彈〉，一睇條題就知，係想話畀人聽《逃犯條例》修訂令移民人數上升啦，但報道一邊引述嘅係保安局舊年嘅數字，一邊引述嘅只係個別移民顧問提供嘅委託申請數字，就砌個故仔出嚟話「送中例逼近，移民人數反彈」？會唔會兒戲咗啲呢？

又玩誤導 散播恐懼

當睇到《生果報》條標題後，正常人嘅第一個感覺，都會以為政府推動《逃犯條例》修訂，令到移民人數「反彈」或者上升，但廣男睇報道內文，就覺得成件事好奇怪喇，因為《生果報》所引述嘅「關鍵」數字，係保安局估計舊年嘅港人移民數字；舊年政府都未話要就《逃犯條例》作出修訂，《生果報》唔係想講今年修例令舊年移民人數上升咁有趣呀？

可能喺《生果報》嘅「神邏輯」而言，佢哋呢個數字只係參考啫，真正嘅理據在於佢哋訪問移民顧問，果位顧問表示「自政府提出修訂《逃犯條例》，查詢及委託申請移民分別較平日激增逾兩倍及逾一成，直指該法例成催化劑，一旦通過，估計移民人數只會有升無跌」；但咁又產生另一個問題喇，單純個別移民顧問提供嘅數字或者估計，係咪足以反映〈送中例逼近 移民人數反彈〉呢？如果《生果報》訪問一間移民顧問公司就當人哋嘅估計或者數字反映「全香港情況」，咁《生果報》以後「造新聞」就真係容易喇，只要凡事以「以偏概全」，咁佢哋想新聞角度點「扭」、點寫都得啦！

移民數字真係多？

當《生果報》咁「鍾意」講近年港人移民數字「上升」，例如舊年約有7,600人移民，比前年6,500人為多嘅時候，其實呢幾千人移民，係咪真係咁多呢？廣男上網睇番資料，喺97回歸前，例如1991至1995年間，平均每年就有5萬幾人移民，之後仲要有好多人回流；相比起以前移民人數以萬計，幾千人移民或者多咗千幾人移民係咪真多，唔同媒體當然可以「各自演繹」，但廣男要提提大家，盲反派利用不同手法恫嚇市民，已經唔係第一次。例如資深大律師李柱銘喺1989年，就曾經稱「當我們想到解放軍將進香港，又想到他們如何對待中國人民」，講到九七後解放軍會對香港人做啲咩咁；講近啲立法會審議高鐵「一地兩檢」果時，盲反派講到行過西九高鐵站都會畀人捉入去押返大陸咁款，事過境遷，盲反派所講嘅種種「恐怖」狀況，都無發生過，97年回歸後到而家，繁榮穩定、經濟向好，盲反派果套「嚇人」理論，好難再呃香港人㗎喇！

原圖:蘋果日報網站截圖