藝人談論政治，往往好容易引嚟批評，尤其係當藝人講一啲唔係盲反派人士或者媒體想聽嘅說話，就更加「麻煩」！近期，網上出現一則疑似係藝人曹永廉嘅網上留言，話「被佔中影響嘅市民，到現在可能家庭破裂，一無所有，呢個判決公平嗎？法治已死」，之後又有留言講黃之鋒「希望佢快啲香」，事情當然引發盲反派人士「還擊」啦，其中自稱為「深藍絲」嘅《生果報》評論員馮睎乾，仲特登寫文回應疑似係曹永廉嘅留言，不過廣男睇完馮睎乾篇文，腦海中只有一個字，就係「屈」！

馮睎乾玩扣帽子

馮睎乾呢篇題為〈Forever Cheap〉嘅文章，就質疑曹永廉，話自己「作為深藍絲的我反而更想知道：哪個市民因佔中而『家庭破裂，一無所有』？是否傳說中那個趕不及去律敦治醫院產房，結果女兒一出世就『大量腦細胞死亡』的孕婦呢？現實世界也許沒有『曹永廉』口中的市民，正如律敦治醫院根本沒有產房」；廣男首先想講，馮睎乾講一個佢認為係唔存在嘅Case，就講到感覺好似係曹永廉講呢個Case出嚟咁，公正咩？同屈有咩分別？（果個人係咪曹永廉都尚未證實，當住係先！）

另一個問題，就係曹永廉嘅講法，係話「被佔中影響嘅市民，到現在可能家庭破裂，一無所有」，馮睎乾有無留意「可能」兩個字？「可能」嘅意思既係可能有，亦係可能無，曹永廉無講過一定有，咁馮睎乾批評佢咩？批評曹永廉提出「可能性」呀？馮睎乾應該明白「可能」兩個字點解呀？

佔中沒有令家庭破裂？

馮睎乾咁想知道佔中有冇令到家庭破裂，或者有冇「到現在可能家庭破裂，一無所有」，廣男都唔知道，不過廣男上網睇番佔中啲新聞，見到有非牟利機構喺佔中時收到唔少求助個案，包括有一個四口對佔中各持唔同睇法，導致關係惡劣；又有其他非牟利機構喺佔中期間收到過百宗求助個案，求助電話中，有近三成指家庭成員因唔同政治立場出現衝突，最嚴重一單係家人爭執，繼而動手。

唔講家庭破裂，講下市民個飯碗，佔中期間電車業生計大受影響，有電車司機收入銳減，甚至要被迫放無薪假，慨嘆自己兩個仔仲讀緊書，靠佢份人工交書簿費，收入少咗，令屋企都無咗溫暖。如果馮晞乾要確切地問佔中有冇影響到人「家庭破裂」或者到「現在家庭破裂」，廣男唔敢講，但曹永廉講嘅可能性，唔係無呀？

老實講，藝人講政治，被《生果報》針對好平常，不過人哋話佔中而家可能令家庭破裂，有講錯咩？唔通大家相信佔中會令家庭和睦，社會大團結，從此不再撕裂？（笑）

原圖：Takungpao