「末代港督」彭定康日前又針對港府修訂《逃犯條例》說三道四，聲稱修例係九七以嚟「最差嘅事」、「打破咗中央對香港嘅『一國兩制』承諾」；仲話修例令到中國內地與香港之間嘅「防火牆」被移除咗，總知就講到好恐怖咁。恕囍雨「才疏學淺」，實在唔明白彭定康講嘅嘢道理何在，明明修例係通過香港嘅立法會進行，修例後案件由法庭把關，正正體現「一國兩制」下香港嘅法制優勢，又點會破壞「一國兩制」呢？彭定康為抹黑港府、中央，無視香港現存嘅法律漏洞，難怪本港前刑事檢控專員江樂士都忍唔住寫文章駁斥佢，仲話佢係借香港打擊中國啦！

根據傳媒報道，彭定康日前喺倫敦出席一個活動時，表示修訂《逃犯條例》「威脅香港作為國際金融中心嘅地位」，仲聲稱「如果中央看待香港就好似看待深圳、上海一樣，只將香港當作內地一部分」，咁日後國際社會就會有「香港似乎已經唔再特別」嘅睇法；彭定康仲話，如果香港政府通過修例，「中國內地與香港之間嘅防火牆將被移除」云云。囍雨就好懷疑，彭定康又講呢啲，係咪有咩政治目的呢？講到「離嗮地」，唔怪得連江樂士都忍唔住要撰文駁斥佢啦！

多個歐盟國家與中國簽訂引渡協議

江樂士作為資深大律師、前刑事檢控專員，喺文章直頭點名彭定康KO佢！江樂士明確指出，其實一啲歐盟國家，例如法國、葡萄牙、羅馬尼亞同西班牙，都同中國內地簽訂咗引渡協議，如果呢啲國家覺得啲逃犯喺遣返過程中會受到唔適當嘅對待（would not be treated appropriately on return），咁又點會同中國簽協議呢？再者，呢啲歐盟國家同中國簽引渡協議，點解又唔見彭定康出聲反對、抗議呢？江樂士又舉例，例如喺2016年，法國就將涉嫌貪污嘅通緝犯陳文華送返中國受審；今年，西班牙又將兩名涉嫌電騙嘅台灣疑犯移交畀北京。對於呢啲案例，彭定康係完全無表達過任何憂慮架喎。江樂士「正面抽擊」彭定康，指佢根本就係有選擇性地抨擊香港（By selectively criticizing Hong Kong），繼而利用修例一事去攻擊中央政府（stick with which to beat China）。

修例強化香港法治 加強有效執法

事實上，今次修訂《逃犯條例》，江樂士都認同加入咗好多保障措施，例如一啲涉及政治性嘅罪行，又或者疑犯可能因為政治異見而受到懲處，甚至有可能被加控其他罪名，統統都唔會構成遣返。囍雨想講，江樂士所講嘅保障，正正係因為喺「一國兩制」下，有奉行《普通法》嘅香港法庭、法官作把關，冇可能出現如彭定康以至香港盲反派們所講嘅「橡皮圖章」、「隨便捉人」等情況。值得留意嘅係，同樣奉行《普通法嘅》英國，雖然英國同俄羅斯簽訂咗引渡協議，但喺過去17年間，對於俄羅斯提出嘅67宗引渡申請，英國就拒絕咗63宗。囍雨就喺度諗，點解彭定康又唔問下英國政府同俄羅斯簽訂引渡協議呢？英國移交逃犯去其他「非民主制」國家佢唔出聲，佢曾經作為前歐盟委員會代表，又唔見佢反對歐盟國家同中國簽協議，偏偏而家香港修例佢就咁多嘢講，佢想做咩，真係心照不宜！

誠如江樂士所講，今次修例係香港強化法治秩序、促進更有效執法嘅表現（strengthen the legal order, and to promote more effective law enforcement），而根本唔係彭定康所講嘅「回歸以嚟最差嘅事」。囍雨就覺得，彭定康想借香港攻擊中央，但面對住法律界專業人士江樂士嘅事實理據，彭定康好明顯俾人完美KO咗啦！

圖片來源：大公報