有傳媒報道，正在潛逃嘅旺角暴動案疑犯黃台仰，獲得德國政府批出難民庇護，囍雨睇到呢單新聞可以話係「大惑不解」，「難民」呢個字畀人嘅感覺，係一啲受到迫害甚至有殺身之禍嘅人，迫於無奈而流亡海外成為難民，但黃台仰作為一單暴動案嘅疑犯、逃犯，甚至畀人話係「主犯」，佢憑乜嘢可以得到外國庇護呢？如果犯咗事離開香港就可以得到庇護，咁仲成世界嘅？

黃台仰、李東昇棄保潛逃

根據《紐約時報》報道，暴動案疑犯（亦可以話係棄保潛逃嘅逃犯）黃台仰同李東昇喺去年五月，獲得德國批出難民庇護，報道仲形容今次事件係回歸以嚟第一次有香港人獲得外國庇護，有關報道甚至得到黃台仰用短訊回覆，黃台仰表示擔心最終會被認出，認為唔能夠再隱藏落去，日後會交代更多詳情；而德國有關部門亦向《紐約時報》證實，去年向兩名香港人批出難民庇護，但就無透露二人身份。

黃台仰曾揚言寧為玉碎

雖然德國有關部門未有公開獲庇護嘅港人身份，但黃台仰本人已經承認有呢件事，囍雨真係要問一句，佢哋點解係「難民」呢？如果一個人無犯法或者涉嫌違法，被政府或者執法部門所迫害而要流亡海外，咁呢啲就稱得上為難民；但黃台仰同李東昇作為本港旺角暴動案嘅疑犯，所犯嘅係刑事罪行，其中黃台仰更加可以被稱為「主犯」，佢哋有資格成為難民，得到其他國家庇護咩？唔好忘記，黃台仰喺旺角暴動發生後，曾揚言將有更多議題要走上街頭抗爭，「希望大家能夠相信及堅持：寧為玉碎、不作瓦全」，難度有人涉嫌違法後講明自己「寧為玉碎、不作瓦全」，仲可以成為「難民」？

另一個問題，就係黃台仰同李東昇，其實舊年已經獲批庇護，點解傳媒尤其係美國媒體，要喺呢個時候將呢個消息公布出嚟呢？係咪因為本港立法會正在審議《逃犯條例》修訂，外國媒體要喺呢個時候放出消息，話畀人聽如果《逃犯條例》修訂通過咗，呢啲盲反派稱為「政治犯」嘅人，就會受到影響呢？事實上，黃台仰本人接受《金融時報》訪問，亦表明關注《逃犯條例》，稱自己作為一名「政治犯」有必要發聲，擔心修例後會「永遠無法回港」，又話而家先公布消息，係因為要引起外界關注六四30周年。換句話說，外媒而家先報道有關事件，黃台仰本人又表示關注修例，其實係「時間」夾得啱啱好，好似跟個劇本嚟做咁，就係要借事件反對《逃犯條例》修訂，製造聲勢。

旺角暴動「叫人衝」

講開旺角暴動，又講開黃台仰，囍雨喺度要提提大家，喺旺角暴動案梁天琦在法庭作供嘅時候，清楚地講過黃台仰喺暴動期間叫人「數三聲，就衝！」，仲同梁天琦講「你唔衝過去，他們（警察）都衝埋嚟」，之後黃台仰就號令暴徒衝向警方；囍雨必須強調，呢番說話係出自黃台仰「戰友」梁天琦把口，如果黃台仰呢個暴動案疑犯、「主犯」可以得到難民庇護，囍雨只能講句，世上任何罪犯，都有潛質成為難民，得到「免責」保護傘！

原圖: 大公報