《生果報》創辦人黎智英喺一個午餐會上面「談笑風生」，除咗同盲反派出盡全力地抹黑《逃犯條例》修訂外，黎智英仲講到有關《生果報》推行訂閱制嘅問題，佢話多得全國政協副主席梁振英「狙擊」《生果報》，提醒咗讀者《生果報》冇廣告，聲稱「我諗呢個係點解我哋而家有300萬會員訂閱」。《生果報》嘅訂閱人數，真係「多得」梁振英？定係「多得」《生果報》買新聞、販賣藝人私隱，所以啲訂閱人數先升得咁快呢？

想起「安心」事件

當黎智英想話因為政界人士批評或者狙擊所以令《生果報》有咁多人訂閱嘅時候，老實講廣男真係笑咗出嚟嘅；根據廣男粗淺嘅觀察，自《生果報》推出訂閱制嘅時候，佢嘅訂閱人數的確係一直上升緊，但令到佢訂閱人數「直線上升」嘅原因，唔係因為咩政治人物或者政治事件，而係佢哋懷疑用巨款買咗藝人喺車廂「親熱」嘅影片（所謂「安心」事件），然後喺《生果報》網站作獨家報道。條片出街之後，啲網民除咗不斷議論當事人之外，廣男見到有啲網民留言，直頭話《生果報》「贏咗」，「成功」令佢哋註冊成為會員，因為如果唔註冊，就睇唔到相關藝人嘅「私隱」片段。

有傳媒報道，因為「安心」事件，令到《生果報》嘅訂閱人數突破200萬，估計剩係呢單新聞，就為《生果報》貢獻咗數以十萬計嘅訂閱人數；所以當黎智英話多得梁振英「狙擊」《生果報》嘅時候，廣男真係忍唔到笑，明明就係《生果報》靠買新聞、販賣藝人私隱「谷」訂閱人數，佢哋仲好意思攞訂閱人數「上升」單嘢嚟講，係咪咁唔怕醜呀？

冇廣告的事實

喺黎智英喺午餐會演講嘅前一日，《生果報》又喺網上平台發表其他藝人嘅所謂「獨家床照」，如果你問廣男，廣男就覺得呢啲新聞，可以話係《生果報》訂閱人數不斷上升嘅「主要力量」。至於《生果報》冇乜廣告，或者好似黎智英所講梁振英「提醒咗讀者《生果報》冇廣告」嘅問題，老實講，當一份報紙成日都玩政治攻訐、抹黑，又不時「歌頌」罪犯、違法行為，少咗廣告很正常吧！