香港外國記者會（FCC）噚日搞咗個午餐會，今次就請來《壹傳媒》創辦人黎智英做演講嘉賓。毫無懸念，梗係又要反對修訂《逃犯條例》啦！黎智英聲稱，今次修例仲衰過廿三條立法，又話一旦通過修例，「將會係對自由、法制和新聞自由嘅屠殺」等等。囍雨就諗唔明，一向以嚟，喺香港做傳媒、採訪新聞，以至寫評論、發表意見，都享有高度自由，印象所及，從來唔會無端端畀人話犯法、畀人拉，即使通過咗修訂《逃犯條例》之後，呢啲權利同樣受到保障，完全冇影響，又何來「扼殺新聞自由」呢？

睇番媒體報道，黎智英除咗講「新聞自由」之外，仲喺個午餐會上好激動咁話，一旦通過修例，香港就會「玩完」；佢又舉例話即使通過廿三條立法，「如果我被拘捕，都仍然喺香港嘅法庭審訊」，但如果通過咗修例之後，「隨時都可以被引渡至中國審訊，而且沿用嘅係中國法制」，佢甚至「預言」會有越來越多人好似林榮基咁「被迫逃亡」。總之就講到未來引渡罪犯就好似「自助通關」咁好容易、好得人驚，好似完全唔使經過法庭把關咁款。

須符合雙重犯罪原則

囍雨唔知黎智英係真唔知修例講緊乜，定係存心要誤導市民、製造恐慌，不過必須講清楚嘅係，如果一個人涉嫌觸犯內地法律，咁佢嘅行為同樣要喺香港都算違法、而且符合「可判以監禁超過3年」嘅條件、仲要屬於「可引渡罪項」名單裡面所包含嘅罪行，先至有可能被移交，而且成個移交嘅審理過程，都由香港法庭把關。否則，根本就唔會出現黎智英所講嘅情況。囍雨好奇嘅係，黎智英講得咁激動、咁驚，又「被捕」又「逃亡」咁，係咪自己「身有屎」呢？抑或，佢創辦經營嘅傳媒機構涉嫌違反咗內地法律呢？

黎智英公司曾承印六合彩報

呢樣嘢囍雨就真係唔知啦，不過，據香港傳媒年前報道，荼毒內地市民嘅三份港產六合彩報《創富》、《貼士皇》及《六合皇》，與壹傳媒有限公司主席黎智英都有千絲萬縷嘅關係，三份六合彩報均曾經由黎智英旗下嘅公司擔任承印人多年。報道仲提到，根據報刊註冊紀錄，自2003年9月起，該三份六合彩報承印人一直係超企印刷及傳訊有限公司（下稱超企），而當時超企嘅董事都係壹傳媒有限公司嘅董事或要員，包括主席黎智英等。而2009年，壹傳媒嘅年報亦刊出，持有超企股份的Database Gateway Limited及蘋果日報知識產權有限公司，都是壹傳媒嘅附屬公司。至後嚟事件被揭發後，呢三份報紙嘅承印人，名義上突然轉為另一間創能有限公司，但實質上就「換湯唔換藥」，繼續由超企承印。

當中係咪有咩「內情」，或者黎智英以至《壹傳媒》有冇涉及違法，囍雨就唔敢亂猜測喇。不過，今次佢咁落力、以一個「媒體創辦人」嘅身份企出來反修例，囍雨就會諗，當中係咪「有啲嘢」呢？尤其係大家應該都記得，黎智英、陳日君等呢班「逢中必反」人士，喺多個公開場合煽動過叫人「上街」反修例，今次佢所講嘅嘢，係咪又想製造啲恐慌，從而慫恿人「上街」，甚至醞釀緊另一個大型反政府行動呢？

原圖：大公報