盲反派全力阻止《逃犯條例》修訂立法，佢哋嘅元老級人馬、資深大律師李柱銘仲帶隊去美國、加拿大，越洋向外國勢力「投訴」港府同中央；據傳媒報道，美國國會一個委員會舉辦咗場聽證會，為咗抹黑《逃犯條例》，李柱銘竟然話條例通過會令喺香港嘅外國人成為「北京潛在人質」、將「綁架合法化」。查實中美關係而家咁緊張，李柱銘仲走去「告洋狀」，為咗「幫美國打倒中國」而不惜犧牲香港，想話佢唔係實踐緊自己「日日做漢奸，有需要時就做漢奸」嘅承諾都唔得。

在美發表謬論

根據傳媒報道，正身處美國嘅李柱銘等人出席美國國會有關委員會嘅聽證會，李柱銘發揮佢「噏得就噏」嘅大狀本色，稱「移交逃犯的修訂將會把綁架合法化，更會摧殘香港這個自由城市」，仲話美國喺修訂下「利益攸關」，因為幾萬個喺香港生活、工作嘅美國人，北京都可以用「莫須有」罪名引渡到內地。講到在港美國人隨時「畀人捉番內地」咁款，係真唔係真呀？之前李柱銘講過高鐵「一地兩檢」對「一國兩制」造成傷害，結果呢？而家高鐵「一地兩檢」冇事發生過，大家係咪要信李柱銘，真係要諗清楚！

 囍雨必須指出，李柱銘所謂「綁架合法化」、用「莫須有」罪名被引渡等，統統都係一派胡言，因為喺《逃犯條例》修訂下，如果真係有人喺內地犯法而潛逃到香港，就算內地提出引渡，都有香港法庭把關，有關人士可以提出申述、反對，甚至可以上訴、申請人身保護令同埋提出司法覆核，亦受到「雙重犯罪原則」所保障，李柱銘講到「綁架合法化」、「莫須有」罪名，擺明係連香港法庭、法官都想貶低！

李柱銘曾立志做「漢奸」？

老實講，而家中美關係咁緊張，而李柱銘等人偏要喺呢個時候去美國「告洋狀」，明顯畀人感覺佢係「幫美國，打中國」，而佢近日嘅一言一行，就令囍雨諗起佢曾經講過嘅一啲說話。喺回歸前幾個月，李柱銘就去美國「爭取」想香港問題國際化，仲話如果無國際間強大嘅壓力，中方有可能會破壞1984年達成嘅協議，仲要求美國總統要見佢。換句話說，李柱銘有事並唔一定係搵港府、中央傾，而係直接去美國，搵「老大哥」出頭。

曾揚言「你話我做漢奸，我日日做漢奸，有需要時做漢奸」嘅李柱銘，近日到外國「告洋狀」、為外國勢力提供彈藥嘅行為，係咪實踐緊「漢奸承諾」呢？

原圖:RTHK