經常提出司法覆核、被稱為「長洲覆核王」嘅郭卓堅最近又有新動作，佢噚日就立法會秘書長陳維安以傳閱通告嘅方式處理內務委員會更換主持嘅問題，向高等法院提出司法覆核，稱此舉違反立法會《議事規則》；但佢呢個舉動似乎連盲反派自己友都唔撐佢，話佢提出覆核如果法院確定陳維安做法無違反《議事規則》，變相會令盲反派議員「玩完」。囍雨就覺得，郭卓堅提出司法覆核，分分鐘會令法院KO番盲反派，適得其反。

郭卓堅幫立法會秘書處開路？

對於郭卓堅提出司法覆核呢個舉動，有盲反派網媒就登出評論文章，話盲反派搞咁多嘢，唔係為咗審議法案，而係趁亂阻延法案審議進度先真，但郭卓堅似乎就欠缺「大局觀」，質疑佢提出司法覆核等於認同反對派把持嘅會議係非法嘅，因為如果涂謹申「主持」嘅法案委員會係「合法」嘅，郭卓堅覆核啲咩呢？更重要嘅係，如果輸咗官司，或者法庭認為秘書處有權自己決定，咁盲反派議員真係多得郭卓堅唔少！

對於質疑郭卓堅「幫倒忙」呢種說法，囍雨都有啲認同，如果涂謹申果個先係「真正」嘅法案委員會，其實郭卓堅去JR（司法覆核）立法會秘書處做法，係咪等於佢都承認立法會秘書處發出嘅通知先為之正統、涂謹申「主持」嘅係「山寨貨」呢？老實講，法庭會唔會受理郭卓堅提出嘅JR，或者郭卓堅最後會唔會勝訴，都仲係未知之數；但囍雨覺得，郭卓堅似乎唔係想完全企喺盲反派果邊「齊心做事」，而係睇自己有冇位「入政府」。

被指濫用司法程序 欠下訟費以千萬計

講開又講，有一點囍雨覺得相當之奇怪，當郭卓堅不斷提出司法覆核嘅時候，佢之前因為輸官司而欠下嘅訟費，佢到底找咗數未？據報，佢欠下嘅訟費已經係以千萬元計，佢自己都話「最好爭夠一億（元）」；其實提出司法覆核係每個市民嘅權利，但係當有人不斷提出司法覆核、敗訴又唔找數，係咪應該有個機制去處理？事實上，處理過郭卓堅覆核案件嘅法官都指出過司法覆核被濫用，大家都應該諗下，點樣防止我哋嘅公帑、公共資源畀啲別有用心嘅人所耗費。

原圖:大公報