日前又有一宗涉及年前「旺角暴動」嘅案件審結，至今有關於「旺暴」嘅案件大部分已經審結。但唔知點解，《生果報》上星期五就整咗一系列有關「旺暴」嘅報道，聲稱要解構「埋藏黑夜的真相」；廣男睇完相關報道，發現當中都有好多位喺有意無意之間滲出「旺角暴動，警方有責」嘅訊息，《生果報》呢一系列報道實在令人懷疑，《生果報》借所謂「解構真相」誤導市民，企圖想將「旺暴」呢場暴亂嘅責任推卸畀警方，從而美化暴動！

是解構旺暴 還是砌警方「生豬肉」

就喺盲反派動員支持者到立法會集會、反對《逃犯條例》修訂嘅同一日，《生果報》唔知專登定巧合咁整咗一個有關「旺角暴動」嘅系列報道，廣男抱住一夥「好奇心」睇下佢寫咩啦，發現當中有好多位，都喺有意無意之間將「旺暴」嘅責任推卸畀警方。例如喺其中一篇報道，稱「衝突雙方對此都脫不了責任」、「香港警察當晚行動部署亦是關鍵」，甚至質疑警方係咪「打擊小販」、「部署失當」等等，大有暗示警方「好有責任」嘅感覺。

喺另一篇有關「旺暴」、題為〈旺角騷亂解構：親歷者口述重組混戰10小時〉嘅報道，《生果報》又用類似手法，講到食環執法、警方被包圍而揮動警棍、阻止衝擊、警員向天開槍示警等行為，都好似係執法人員令衝突升級嘅原因咁。廣男對於呢啲擺明幫暴徒嘅報道「角度」，實在唔想一一回應，但一定要問《生果報》一個問題，群眾包圍、衝擊甚至攻擊執法人員，《生果報》描述到執法人員「不可卸責」咁，咁執法人員係咪要由得示威者叫囂、包圍甚至襲擊，然後唔執法，搵處理警民關係嘅警員去向不法份子求和，先叫做啱呢？所謂解構旺角暴動，畀人感覺原來係想講「點解咁暴力呀？咪係警方執法激嬲咗班暴徒囉！」

顛倒是非的傳媒

誠如警察員佐級協會主席林志偉所講，有報道將責任推畀現場堅毅執法嘅警務人員，始作俑者絕對係組織同暴徒嘅責任，廣男覺得《生果報》用呢一系列報道去「入警方數」，完全係顛倒是非，偏幫暴徒。之前有坐緊監嘅暴徒寄信畀《生果報》管理層，該名管理層其後仲回信畀暴徒，用「野豬精神」去鼓勵對方，廣男懷疑，《生果報》唔知係咪已經由以前嘅所謂支持「民主」，轉型為鼓勵「暴徒」？咁嘅報紙，唔單止隨時會嚇走廣告商，相信長此下去，連支持開佢哋嘅讀者都可能會放棄佢哋。

原圖:文匯報