因為「報應」、「自作孽」同「天譴」論，《生果報》評論員李怡受盡各方抨擊，本來一個人講咗涼薄、詆毀死人嘅說話，好應該向離世者家屬以至社會道歉，但「反中」反上腦嘅李怡，竟然一反常態，唔單止無道歉，仲要繼續寫文為自己辯解，今日仲寫文章話如果佢咁係「缺德」，佢願意「缺德」到底。言下之意，即係只要自己係弱勢者，就幾涼薄都得？廣男覺得讀者以至廣告商真係要諗下，係咪要繼續支持咁缺德嘅《生果報》以至李怡。

再寫文章 散播涼薄言論

其實兩、三日前，李怡已經有篇文章講「天譴」，話佢自己嘅文章無話地震係天譴災民，不過其後想法有變，覺得天譴「既是對掌權者也是對人民的警告」，甚有話災民「抵死」嘅感覺；到今日，李怡喺《生果報》又有篇題為〈世道人生：弱勢者的渺茫希望〉嘅文章，講番佢自己嘅「報應」、「自作孽」同「天譴」論，為自己嘅涼薄言論辯解，臨尾仲要加句「如果這是『缺德』，我願意『缺德』到底，因為天譴、報應、自作孽都是居弱勢者在絕望中的渺茫希望，是弱勢者的訴求」。

廣男想講，李怡所謂嘅「解釋」，基本上都站唔住陣腳，例如佢用「報應」嚟形容全國人大代表王敏剛離世，呢個唔只講緊係咪「報應」嘅問題，佢內文用極其涼薄嘅字眼侮辱死人，其他人睇到都批評佢詆毀死人，佢依家喺度講咩「否定世上有報應」等等，都只係「語言偽術」；而佢話泰國船難係「自作孽」，佢自己文章都寫「參加『零團費』的中國人，也受貪便宜和心存僥倖的『自作孽』心理支使，終於『不可活』也」，咁仲唔係詆毀死人，仲要辯駁啲咩呢？

「缺德」到底的評論員

老實講，政治立場可以唔同，但人道立場應該「無分政見」，當中國或者中國人蒙難，任何政客或者時事評論員就算再「反中」、再討厭內地人，都唔應該攞死人嚟「抽水」，侮辱已經離世嘅中國人；但「由左變右」嘅李怡，就好似「見人死、心歡喜」咁，一而再，再而三咁侮辱死人，佢如果尚有良知，就應該向離世者家屬、社會道歉，而唔係一路辯駁，一路踩多「死人」幾腳。當《生果報》、李怡已經連人性都近乎泯滅嘅時候，讀者以至廣告商真係要諗下，再支持《生果報》，其實係咪等於助長歪風。 

原圖: RTHK