佔中九犯被定罪，當中戴耀廷等人已經坐監，但盲反派嘅「造神」運動，到而家都未停止。中大高級講師蔡子強日前就喺報章撰文，點名讚揚坐緊監嘅黃浩銘、陳健民等人，更稱黃浩銘表現出高貴嘅一面，係非常優秀嘅年輕人。囍雨真係想問下蔡子強，佢既然講到罪犯咁高貴，點解佢自己又唔高貴一下，自己去衝去犯法呢？佢係咪同其他盲反派一樣，喺度玩「叫人衝，自己鬆」？

蔡子強呢篇題為〈化作春泥更護花〉嘅文章，開頭就引用晚清詩人龔自珍的名句「落紅不是無情物，化作春泥更護花」，將佔中九犯形容為「化作春泥」，犧牲自己坐監，仲會啟發到更多人參與社運，仲話受到黃浩銘所感動，稱黃浩銘「表現出高貴的一面，他實在是一個非常優秀的年輕人」云云。講到底，就係想將被判囚的佔中犯「英雄化」，當罪犯係「護花使者」，宣揚犯法坐監係無私嘅表現，甚有鼓勵其他人仿傚之嫌。

「叫人衝，自己鬆」

有趣嘅地方係，寫文歌頌佔中犯嘅蔡子強，自己喺文章度承認，在4月28日《逃犯條例》修例遊行當日，原來係喺附近遊行地點附近嘅天橋觀察，目送遊行隊尾。老實講，囍雨覺得蔡子強真係好醒，遊行示威隨時「爆大鑊」，佢就識得「避險」，等其他人去遊行、示威，自己就「居高臨下」，睇下會唔會有「戰事」發生；其實蔡子強呢種做法，喺盲反派入面好普遍，例如公民黨立法會議員楊岳橋，佢自己身為大律師亦從來唔會自己去衝擊，只會鼓勵啲社會人士，到人哋真係有事，要留案底甚至坐監，佢仲可以抽水話「案底令人生更精彩」。所以喺盲反派陣營，「死」嘅多數都係啲去衝、去闖嘅後生仔，啲「老江湖」政客，永遠都Play safe，有事都唔會上身。

囍雨前排喺網上面，見到一個被「定位」 為本土派KOL嘅人，有篇文詳述點解遊行冇年輕人，當中一句「你叫我出來衝？衝完好等你們有點緩衝，買時間，用我們的未來，自由，生命，前途做人盾，等你們可以離開香港？你遊行你的事，不要搞我」實在非常正斗，盲反派推年輕人做「爛頭卒」呢套玩咗咁多年，如果班後生仔仲信佢哋，隨時「誤墮法網」都唔知咩事；如果諸如蔡子強、楊岳橋等人士覺得自己言行一致，無「叫人衝，自己鬆」，囍雨建議佢哋下次可以「一馬當先」，等人哋唔好覺得佢哋剩係識「指點江山」。

原圖: RTHK