《生果報》評論員李怡因為以「報應」詆毀已經離世嘅全國人大代表王敏剛，被社會各界人士口誅筆伐，而一度沉寂一時；但向來仇視中國人，甚或「恨不得中國人死」嘅李怡，今日竟然又喺報章撰文，講番佢當年稱汶川大地震為「天譴」嘅文章，文章尾段仲話「覺得天譴既是對掌權者也是對人民的警告」；廣男想問，李怡係咪又想講喺災難逝世嘅死難者係「抵死」呢？

突然重提涼薄言論

今日李怡喺《生果報》有篇題為〈天 譴〉嘅文章，突然重提佢當年喺汶川大地震翌日發表嘅文章，話自己講「天譴」唔係話「天譴」災民，稱當時批評佢嘅聲音入面，好少人「細研」佢嘅語義，但到咗文章尾段，佢又話「我一直自辯我的文章沒有說地震是天譴受難的災民。但其後我的想法有所改變，覺得天譴既是對掌權者也是對人民的警告」；佢咁講法，係佢承認話地震係「天譴」人民，定係本身冇呢個意思，但之後改變想法，覺得「天譴」都係對人民嘅警告？

廣男就覺得，如果李怡重提「天譴」論，係想話畀人聽就算佢之前唔係話「天譴人民」，但而家有呢個諗法，咁佢真係涼薄得過份！由2008年到而家，汶川地震發生咗都差唔多十一年，好多災民就算無遇難，佢哋身邊都有家人、朋友因地震而離世，所以仲活喺悲痛之中，點解李怡仲要喺呢個時候重提事件，臨尾仲要加一句「天譴既是對掌權者也是對人民的警告」，講到啲人好似「抵死」咁呢？難道政治立場唔同，就連死人水都要「抽」？呢種評論手法，恕廣男不能夠認同，甚至覺得應該要譴責！

至今仍不道歉

事實上，無論係李怡意指汶川大地震係「天譴」、泰國船難係「自作孽」以至王敏剛離世係「報應」都好，基本上佢講過咁多涼薄說話，又講過咁多說話為自己辯解，但佢就從來都無就涼薄言論向死難者或者離世者家屬道歉，仲要擺出一副「你哋唔明我講咩所以誤解我啫」嘅樣子。廣男想講，報章評論員「抽死人水」，可恨，抽完死人水仲要覺得自己啱晒，兼再寫文繼續「抽水」，更可恨！

原圖:RTHK