盲反派反對《逃犯條例》修訂，呢樣嘢就人盡皆知㗎喇，但囍雨估唔到，盲反派為咗反對修例，噚日竟然喺秘書處宣布會議改期、無會開嘅情況下，喺立法會自己「集會」扮開會，仲「選出」民主黨涂謹申、公民黨郭榮鏗做法案委員會嘅「正副主席」。囍雨就喺度諗，如果盲反派可以「圍埋傾計」當係真嘅立法會會議，然後選番自己人做法案委員會主席、副主席，咁盲反派咪可以直接自己選埋涂謹申做「立法會主席」？都唔知好嬲定好笑。

傾計當開會

噚日本來召開《逃犯條例》法案委員會會議，但新任會議主持石禮謙以至立法會秘書處，都宣布咗無會開㗎喇，唔知一班盲反派到底盤算緊啲乜，竟然自己走去會議廳「扮開會」，然後自己又「選出」涂謹申同郭榮鏗做委員會嘅「正副主席」，仲通過要求政府撤回草案的議案，兼決定喺本周六朝早開會。呢單盲反派「扮開會」事件，可以話係創咗香港議會史嘅「先河」，議員自己圍埋傾計當正式「立法會會議」，仲要講到似層層咁款！

大家諗下，如果盲反派自己圍埋傾計可以當係「立法會會議」，咁佢哋唔單止可以要求政府撤回草案，佢哋其實可以選埋涂謹申做立法會主席，甚至提出兼通過埋有「公民提名」嘅普選議案都得㗎喎！今次呢場「扮開會」嘅鬧劇，可以話係令成個立法會蒙羞，原來一班高薪厚祿嘅立法會議員，竟然無聊到，喺度「扮開會」、「扮選正副主席」、「扮提出同通過議案」，計囍雨話齋，呢班政客係喺市民面前「扮有做嘢」先真。

涂謹申要報警？

話說回來，盲反派噚日扮完「開會」，涂謹申仲公開講，話嚟緊星期六有人阻佢主持會議，佢或者會「報警」、執行議事規則云云。如果涂謹申真係當咗自己係主席、有權執行議事規則，囍雨實在懷疑，佢仲有冇能力執行立法會議員嘅職務。當大家以為盲反派「拉布」、拖延會議好過份嘅時候，原來佢哋已經「更進一步」，進入咗「幻覺」嘅狀態，幻想自己真係主席，已經撤回咗《逃犯條例》㖭，睇嚟囍雨真係要寫個「服」字送畀佢哋。

 原圖: RTHK