兩名反對派政客郭紹傑嚴敏華舊年十二月走去日本示威，喺神社門口燒「神主牌」，結果畀人拉咗，至今足足四個幾月都未放出嚟；日前郭紹傑嘅日本代表律師仲表示，佢被判監嘅可能性「非常高」。郭紹傑此番坐監坐到去日本，仲要坐到由「平成」跨入「令和」都未放番出嚟，如果用李永達、楊岳橋講過嘅「金句」嚟衡量，郭紹傑隨時係盲反派裡面「最似樣、最精彩」嘅一個。不過，依家身在異鄉、苦陷囹圄嘅郭紹傑，似乎就係另一番感受。

體會坐監滋味？

據媒體報道，當得知判監可能性非常高之後，郭紹傑表示「感到對不起家人，尤其係年老嘅母親同自己嘅仔女」；郭又向記者承認當日行為鹵莽，但佢仍然覺得自己係「和平示威」，唔明白點解被捕，並且質疑係「政治檢控」云云。時至今日，呢個喺「佔中」期間擔任糾察長、壹傳媒老闆黎智英「近身保鏢」嘅郭紹傑，似乎終於明白到坐監嘅滋味係點，終於體會到令家人擔憂嘅果種難受。廣男想講，唔知佢又會唔會因此而明白，一場違法佔領，令幾多青年人、學生要承受法律責任，許多家庭都因此而難受呢？

至於係咪「政治檢控」，廣男無意評論日本嘅「檢控標準」，但今次件事至少說明咗，無論幾民主、幾自由嘅國家，都唔會容忍違法行為，一旦犯事，執法部門就要依法做嘢。盲反派人士以前喺中聯辦、政總門口焚燒物品，除咗燒國旗、區旗外，基本上都毋須負上刑責，但如果佢哋以為，呢一套去到日本一樣行得通、凡事叫兩句「政治檢控」就會有人出面撐腰，明顯就係大錯特錯。

盲反派去咗邊？

如果郭紹傑能因為今次嘅教訓而有所悔過，廣男覺得都不失為佢人生重要嘅一課。不過，唔知郭紹傑會唔會順便反思埋多一個問題，就係班平時「稱兄道弟」嘅反對派點解「集體消失」呢？究竟係覺得郭紹傑已經冇乜「幫助」價值，定係場景換咗日本而唔敢出聲？相信大家心中都自有答案。廣男唯一想奉勸郭紹傑嘅一句就係：盲反派真係信唔過架！

原圖: RTHK