因佔中案被判刑8個月嘅社民連副主席黃浩銘，日前又學戴耀廷咁喺獄中玩寫信，聲稱唔同意法官對公民抗命嘅詮釋，所以要考慮就定罪和刑期上訴。啊，即係唔想找數啦！明白嘅。黃浩銘又講到，自己「寧願天真幼稚，追求公義，都不願唯利是圖，埋沒良知」，好似好偉大咁款。囍雨真心好奇，呢班佔中罪犯入獄之後，個個都變嗮寫信佬，不過信中內容就「千篇一律」，都係為自己塗脂抹粉、鳴冤叫屈；又鬧法官又要上訴。講到尾，都係千方百計想走數。囍雨想講，呢班佔中犯，冇一個肯為自己嘅違法行為承擔責任，咁又係咪「公義」呢？只能說明，佢哋到依家都真係毫無悔意。

講「還債」 又要上訴？

黃浩銘喺佢封「獄中信」講到，「縱使佔中對香港交通造成影響，都不會改變案中被告公民抗命的本質」，因此「會積極考慮連刑期一併上訴，但不會申請保釋」；又批評法官對佔中發起人戴耀廷、陳健民二人量刑起點過重，「未免令人有『祭旗』的觀感」、佢哋「已在牢獄『還債』」云云。呢番講法，又係同戴耀廷嘅論調高度配合。事實上，當社會上唔少聲音都認為，佔中九犯係毫無悔意下已經被輕判之時，呢班人都仲要攻訐法官、搞上訴，大家好應該睇清楚，佢哋其實根本從來都無承認過自己嘅罪責，無諗過要找數。

屢犯不改  如何公義？

至於黃浩銘講自己「追求公義」就更加離譜。相信大家都記得，黃浩銘個「底」一早花嗮，已經因東北案和佔旺案兩度被判入獄。對於一個屢屢犯事仍不知悔改、仲要用歪理美化自己違法行為嘅人，囍雨質疑，佢所追求嘅，又係一種點樣嘅「公義」。

不過，呢個佔中九罪犯中唯一無被法官評為「品格良好」嘅黃浩銘，似乎就對自己嘅「人格」好有自信，仲話「當法官宣讀我的『犯罪』紀錄，我的品格就由公眾評斷，但歸根究柢，我只需向自己和上帝負責」。上帝會否要你負責，囍雨真係唔知，不過違法佔中呢條罪，香港大眾就肯定要你負責！

原圖: 大公報