曾經話過自己一旦因佔中被捕就「唔反抗、唔抗辯」嘅發起人戴耀廷，因煽惑罪被判入獄之後，又開始「心有不甘」，一邊搞上訴、一邊繼續為自己同一班佔犯嘅違法行為狡辯。近日戴耀廷就寫咗一封《來自香港監獄的信函》，自比馬丁路德金之餘，連法官嘅判刑都要攻訐一番，批評「法官對甚麼公民抗命行動才是合乎比例」嘅看法「實在是有點離地」。囍雨真係唔知係好嬲定好笑，一個講過要以承擔罪責嚟完成「違法達義」嘅罪犯，坐咗監之後又強詞奪理、鬧法官判得唔啱，一次又一次推翻自己講過嘅「承諾」，如此反口覆舌、大話連篇，何 「義」之有？！而且，大家唔好忘記，戴耀廷呢班人，到依家都係毫無悔意！

講番戴耀廷封《信函》，佢提出法官「評估佔領運動阻塞交通時的計算方法不合實際」，簡單來講，戴耀廷認為，當「佔領行動」霸佔咗道路之後，受影響嘅市民其實仲有好多途徑可以去到自己嘅目的地。囍雨理解，戴耀廷嘅論調等於係想講：「我佔咗你條路，你點解唔坐地鐵啊？咁都入我數，實在唔啱喇」。講真，囍雨真係唔想去爭拗呢啲咁無聊嘅問題，但係如果戴耀廷想用咁嘅歪理將違法佔領「合法化」，就未免太過侮辱大眾、尤其係無數曾經受佔領所影響嘅市民。而且，囍雨認為，呢番論點正正係呢班佔犯毫無悔意嘅又一例證！

一次又一次推翻「昨天的我」

事實上，大家不妨回顧下戴耀廷呢班人一路以嚟所講過嘅嘢：當最初佢哋宣揚所謂「愛與和平」嘅時候，大家都睇到，所謂嘅佔領行動，從來只有充斥暴力；佢哋話要「公民抗命」、「違法達義」，結果一拖就係四年幾，完全無認過罪；到其後，呢班人被控以「煽惑罪」，上到法庭又抗辯又求情，甚至仲教法官輕判服務令；到今時今日，終於被定罪、判刑，又批評法官理據唔啱、判得唔好，要上訴，甚至伸手向市民攞捐款幫自己嘅官司埋單。呢班罪犯，一次又一次推翻自己講過嘅嘢，四年幾以嚟，無一件兌現過！大家認為，呢種罪犯仲有誠信可言嗎？

用歪理粉飾反社會行為

囍雨相信，戴耀廷嘅呢封《信函》，最明顯嘅用意係想寫畀佢哋嘅支持者睇，甚至有意繼續煽惑一啲秉持「半信半疑」態度嘅市民，同時為自己博取同情；依家所做嘅一連串動作，都係想為自己嘅違法行為塗脂抹粉，營造「79日佔領與我無關、暴力事件與我無關」嘅輿論氛圍，從而為上訴鋪路。囍雨想提醒，當見到戴耀廷之流一再用各種歪理去「正義化」自己嘅反社會行為時，大家真係要小心睇清楚喇，因為佢哋唔單止無悔意，仲可能隨時密謀煽惑新嘅佔領、甚至「殺傷力」更大嘅運動，大家實在唔好再被佢哋嘅謊言所誤導！

原圖:RTHK