佔中九犯早前被判罪成，當中四人亦已經坐緊監，但係盲反派嘅「攻勢」依然一浪接一浪，不停為九犯甚至整個違法佔領行動「漂白」。其中，「香港眾志」黃之鋒喺出席電台節目嘅時候更聲稱「佔領運動期間睇唔到有暴力場面及肢體衝突」；囍雨都可以好肯定咁講句，佢講嘅唔係事實，佔中期間不時出現暴力場面，甚至出現圍警察「搶犯」、圍毆警察等「超暴力」場面，請佢唔好講大話！

黃之鋒 講大話！

雖然盲反派由佔中前甚至到而家都想將違法佔領包裝成「非暴力」嘅「愛與和平」運動，但囍雨必須指出佔中根本就一啲都唔和平，暴力、衝突場面不斷，囍雨想舉出當中兩個最令人心寒嘅場面，溫馨提示下黃之鋒，佢所講嘅根本唔係事實。

2014年10月中，有一晚有示威者借機衝出龍和道，甚至將雜物掟向行駛當中嘅私家車，以致險象環生，三名警員上前追捕涉案人，點知近200名示威者湧至，期間有人刻意腳踢警員，叫警員「放人」，擺明搶犯，場面極度混亂，三名警員畀以百計嘅示威者包圍咗一段時間之後，要其他警員到場增援先「脫險」，過程當中三名警員都受傷，有示威者則因涉嫌「在公眾地方擾亂公眾秩序」同「襲警」而被捕。

警員被圍毆至昏倒

到12月初，三名便衣探員喺金鐘海富中心遇上示威者，部份示威者認出三名休班警係警員之後起哄，有人投擲雜物，一名警員欲拘捕涉事者時，竟然畀逾30名示威者包圍同拳打腳踢，其他兩名警員上前營救結果畀人「打埋一份」，其後大批警員到場先控制到場面，過程中有六名警員受傷，其中一名警員更加畀示威者打到暈倒。大家要問下黃之鋒，呢啲係唔係都唔算係暴力？係佢唔知咩事，定係佢覺得警員係「沙包」，所以見唔到有暴力？

事實上，佔領期間發生過好多次大大小小嘅肢體甚至暴力衝突場面，有示威者不斷衝擊警方防線，有示威者手持有釘盾牌，有示威者向警員淋「有味液體」等等，例子可謂不勝枚舉，黃之鋒作為「雙學」負責人之一，如果佢話自己見唔到有暴力，實在係極不負責任！

話說回來，曾經喺違法佔領期間呼籲群眾「金鐘相見」嘅黃之鋒，好似都未為違法佔領或者盲反派掛喺口邊嘅「違法達義」找數喎，當佢而家好似「局外人」咁喺傳媒面前說三道四嘅時候，大家真係唔好忘記，盲反派仲有包括黃之鋒在內嘅39名違法佔領主事者或者參與者係未被檢控架！

原圖：Takungpao