一班原本聲稱「唔抗辯、唔反抗」嘅佔中罪犯被判刑之後，個個都開始諗計如何可以脫罪、可以唔使坐監。而佢哋嘅支持者亦都開始絞盡腦汁「幫手」。港大法律學院首席講師張達明今日就喺報章刊文提出，九位罪犯「在運動中的角色有限」；無獨有偶，資深大律師李柱銘前兩日亦都講咗相同嘅概念，認為唔可以將79日嘅佔同期間嘅暴力事件，都「入嗮佢哋數」。囍雨就喺度諗，如果咁嘅邏輯都講得過去，咁如果一個人喺森林放火，又預知到可能會燒咗個森林，佢畀人拉果時可唔可以話自己只係燒咗一棵樹，森林大火唔關佢事呢？我哋嘅法治社會，又接唔接受呢啲歪理、狡辯呢？

「之後嘅事，唔關我事」？

張達明聲稱，「控方針對九人的證據集中喺2014年的9月27日及28日，但各人在28日後在運動中的角色有限」，但法官「似乎係將後來79日嘅事情都入晒佢哋數」；李柱銘就話，起訴係針對九罪犯係「警察於9月28日放催淚彈前的行為」，所以法官量刑唔可以將「9月28日警察放催淚彈之後所發生的任何事情，包括79天佔領帶來的妨擾，以及運動期間曾發生的暴力事件，歸咎於九子。」囍雨睇得出，張、李以至九罪犯嘅支持者可能係想講，佢哋最多係「開咗個頭」，但之後會發生咩事，唔係佢哋預計得到喎，所以亦都唔應該追究佢哋「之後果部分」嘅法律責任，但道理係咪咁嘅呢？

早已煽動「最大殺傷力」

事實上，戴耀廷喺2013年1月投稿報章宣揚「佔中」，就係以《公民抗命的最大殺傷力武器》為題，聲稱要「感召萬人上街」，要達致「由示威者違法長期佔領中環要道，以癱瘓香港嘅政經中心，迫使北京改變立場」嘅目的。可見由「佔中」策劃之初，幾名始作俑者就已經將佔領要達到嘅規模、時長甚至後果都統統預計好。簡單來講，之後所發生嘅實際情況，唔單止係佢哋所「預計到」，仲正正係佢哋所要追求嘅效果，而且成功達成咗。囍雨想講，姑勿論「佔中」所造成嘅經濟損失、惡劣影響，單單係諗番當時下跪苦求結束佔領嘅長者、因維護法紀而可能終生傷殘嘅警務人員，呢筆「佔中賬」點都要「入嗮佢哋數」！

按照戴耀廷嘅「佔中」概念，今日睇當日所造成嘅效果，可謂「超額完成」，當日唔少社會有心人群起反對「佔中」都係因為預計到，戴耀廷等人嘅「危險思想」具有大殺傷力，多次勸喻同批評，「佔中三人」仍一意孤行，但今日佢哋竟然喺度詭辯，擺明「打死狗講價」！

原圖：中評社