佔中九犯被判刑，其中戴耀廷、陳健民、邵家臻同黃浩銘須即時入獄，已經身在監牢嘅戴耀廷，依然不忘散播佢所謂嘅「希望」，喺報章撰文話自己要繼續「犯罪」，繼續走抗爭路云云。好明顯，雖然戴耀廷搞完長達79日嘅違法佔領依然唔心息，要繼續搞亂番港；囍雨就覺得，佢所謂嘅散播「希望」，根本只係散播歪風，想煽動香港人繼續「違法達義」，令香港難有安寧之日。

矢言還要「犯罪」

戴耀廷今日喺《生果報》有篇題為〈入獄感言〉嘅文章，話抗爭力量士定會繼續喺香港累積，到關鍵時刻一定會再「爆發」，規模只會比違法佔領大，而佢亦會繼續「犯罪」，到處去散播「希望」；到文章後段，佢仲話香港爭取民主之路同中國憲政之路交錯，如果唔放棄香港民主，就無可避免會捲入建立中國憲政而引發嘅風暴，大家明唔明戴耀廷講咩？

根據囍雨睇咗戴耀廷一啲文章嘅經驗，首先大家要明白一樣嘢，就係戴耀廷所謂散播「希望」，只係一個「違法達義」嘅糖衣包裝，佢真正想散播嘅，係叫人用非法手段去表達政治訴求，違法佔領係一個例子，而家佢想做到嘅，則係繼續散播歪風，醖釀一場畀違法「佔中」更大型嘅抗爭行動。

要民主？定要「港獨」？

至於戴耀廷所謂「只要我不放棄爭取香港的民主，就無可避免會被捲入那為了建立中國憲政而引發的風暴」，呢兩句說話就更值得玩味，如果有睇過戴耀廷一啲有「港獨」意味嘅文章，或者留意過佢去台灣出席「五獨」論壇講過嘅一番說話，就會知道佢未必係想「建立中國憲政」，而可能係想「等」中國「出現狀況」，然後香港可以選擇係咪要成為「獨立國家」。戴耀廷呢篇所謂〈入獄感言〉，唔係反思己過，而係話畀人聽要繼續「犯罪」，甚至連自己國家都想搞埋，香港人真係多得佢唔少！

盲反派英雄化佔中犯

無論係戴耀廷自己抑或其他盲反派人士，近期都係咁吹捧佔中九犯，甚至講到佢哋係「英雄」咁款，將「違法達義」講到好威、好有型咁，再配合埋「案底令人生更精彩」、「唔坐幾個月監邊似樣」嘅論調，其實係要吸引更多年青人「上釣」；但有咁多因為「違法達義」而被定罪嘅「前車」在前，大家真係要小心身邊有年青人畀班盲反派「洗腦」呀！

原圖:大公報