噚日佔中九犯被判刑後，一眾反對派立法會議員好悲情咁發表所謂《聯署聲明》，聲稱對判刑感到「難過、憤怒」，又話會「對九犯嘅付出銘記於心」，廣男發覺，《聲明》裡面有幾個關鍵詞好「搶眼」，包括「政治武器」、「政治審訊」、「白色恐怖」同「失去免於恐懼的自由」等等。廣男質疑，盲反派咁講法，其實係咪攻擊緊香港嘅司法制度呢？即係盲反派可以犯法，但政府唔以執法，法庭唔可以審判佢哋？好似係佢哋喺度搞「白色恐怖」先真喎！

呢份由22位盲反派立法會議員聯署嘅《聲明》，稱今次判刑係「利用司法作為政治武器，以達到白色恐怖管治目的」，而「佔中九子面對的是政治審訊，目的是把香港的民主抗爭打壓至噤聲」，又聲稱「專權政府圖令港人連免於恐懼的自由也失去」云云。廣男諗唔明，九犯依家係犯法，仲要明知自己係犯法架喎，關噤聲、政治審訊咩事？ 盲反派平時就大大聲話「尊重法治」，原來當佢哋面對法律制裁，就唔駛尊重法治嘅。

盲反派的「白色恐怖」

當盲反派喺度講「白色恐怖」，大家真係要諗清楚，如果佢哋無做任何事，尤其係無做犯法嘢而被拉被告被定罪，佢哋話係「白色恐怖」，廣男覺得仲可以，但佢哋喺2013年就開始話自己要「違法達義」、「佔領中環」，講明會犯法，又話自己會自首承擔罪責，之後將違法概念付諸行動，政府之後依法辦事，法庭依法審理案件再判刑，請問邊度係「白色恐怖」呢？盲反派係咪又想用「大話講一百次變真話」嘅招數，令到人聽聽下真係以為佢哋係無辜、被打壓呢？

誰在剝奪自由？

至於盲反派話判刑令到香港人無咗「免於恐懼的自由」，就更加係顛倒是非、調番轉嚟講。廣男認為，所謂一個人有「免於恐懼的自由」，係包括人處身於安全嘅地方、免於恐懼，其他人唔會、亦唔可以侵犯自己嘅自由。但佔中九犯、盲反派搞違法佔領，堵路、衝擊甚至襲警，似係佢哋令到人「恐懼」「失去自由」先真喎！講到呢度，廣男實在唔可以唔佩服盲反派顛倒是非嘅能力，因為佢哋出於政治需要，真係乜都講得出口！

原圖：圈傳媒