今日，法庭終於就「佔中九犯」嘅罪名作出判刑。係輕係重，囍雨無意評論，重點係，呢班違法佔領嘅主事者，終於受到法律嘅制裁，係香港法治精神、社會公義嘅彰顯。不過，呢班「佔犯」喺判刑前後，一如既往咁繼續扮偉大、扮義士咁款，口口聲聲講到「仍然願意保衛一國兩制」「唔可以畀政府任意妄為、剝削人權」等等，對於咁嘅言論囍雨就實唔可以接受！第一，依家係有人犯咗法，而法庭依法判刑，係香港法治應有之義，何來剝削人權？第二，大家唔好忘記，破壞法治嘅正正係呢班「佔中」搞手！

囍雨睇到，喺今日開庭之前，一班「佔犯」、尤其係戴耀廷、陳健民、朱耀明三個「佔中發起人」，喺鏡頭面前都繼續扮演「民主衛士」、「偉大的犧牲者」。其中，陳健民聲稱，「有咩天真得過相信『一國兩制』。但我同好多人，都仍然相信『一國兩制』、願意保衛『一國兩制』」；朱耀明就話「唔好因為我哋入獄而放棄抗爭，使政府任意妄為，剝削我哋嘅人權，破壞我哋嘅法治」，又話「每個香港人都要努力，為自己、為下一代創造一個和諧、人民生活幸福嘅社會」云云。囍雨必須講一句，呢啲根本就係歪理！「佔中」79日，呢班搞事者剝奪咗幾多人嘅人權？！又幾時顧及過「社會和諧」同「人民生活」？！

勿讓「佔中」歪風繼續蔓延

時至今日，呢班「佔中」罪犯都繼續用「爭取民主、守護香港」等口號美化緊自己嘅違法行為，但講到「守護、追求」，事實又係咪如佢哋所講呢？大家都清楚，「佔中」係回歸以嚟來規模最大嘅暴力違法抗爭行動，帶有明顯嘅政治企圖，嚴重衝擊香港法治、破壞香港嘅國際形象；喺呢班始作俑者嘅煽惑之下，一大批年輕人負上法律代價，甚至賠上大好前途；社會嚴重撕裂對立，但凡有訴求、有不滿就以為可以通過暴力嚟解決。「佔中」之後嘅「旺暴」，以至近年不斷發生嘅校園暴力衝擊，或多或少都係受到所謂「違法達義」「公民抗命」呢啲歪風嘅影響。試問如果任由咁樣嘅歪理持續，香港社會又點會再有「愛、和平與希望」？！

「十死士」等人仍未找數

囍雨覺得，今日嘅判刑以至整個「佔中」案嘅審訊過程，對所有香港人同樣係「重要一課」，無論為自己戴上幾多「光環」，都唔可以將自己嘅所謂追求凌駕於其他人嘅權利之上，犯咗法就要負上法律責任。誠如法官所講，呢班罪犯，大部分人其實「並無悔意」，囍雨想講，雖然佢哋今日為自己嘅違法行為找數，但大家唔好忘記，佢哋仲欠香港人一句道歉；大家更加唔好忘記，仲有所謂嘅「十死士」，以及「佔中」案另外39名涉案者，到今日都仲未找數！

原圖：圈傳媒