近日，一個叫做「無國界記者」（RSF）嘅國際非政府組織，喺香港公布「2019年世界新聞自由指數」調查報告。講到又「國際」又「無國界」咁勁，大家或者以為好「客觀、公正」啦，不過廣男睇報道就發覺，喺嗰記者會現場，一邊就坐住盲反派議員毛孟靜，另一邊就係記協主席楊健興。廣男好好奇：點解一個無國界記者講嘢，會有一個盲反派人物、同一個出名偏幫盲反派嘅組織代表喺度呢？好似有啲古怪喎！果然，個記者會講講下「新聞自由」，就突然跳咗去講逃犯條例、廿三條立法，一個國際記者組織突然咁關心香港嘅立法問題，好似係一場別有用心嘅政治show多啲喎！

睇番報道，記者會嘅主講人係「無國界記者」組織嘅東亞辦事處執行長艾瑋昂（Cédric Alviani），佢講到香港嘅「新聞自由指數」今年下跌3位、排名全球73，係屬於「問題顯著」級別，仲講到明話香港一旦就廿三條立法、通過修訂《逃犯條例》，「對香港所有記者構成直接威脅」、「必然會令香港新聞自由進一步惡化」，仲呼籲香港市民盡力反對修訂」云云。毛孟靜更加係「最佳女配角」，聲稱到時如果記者「做了北京不喜歡的事，即使回到香港，也可能隨時被引渡」。果頭盲反派喺立法會搞拉布阻止修例，呢頭就有「無國界記者」開記招「幫拖」，一唱一和，時間仲夾得啱啱好，當中係咪有啲古怪呢？

抓逃犯影響新聞自由？

廣男質疑，呢個「無國界記者」到底知唔知《逃犯條例》係咩一回事呢？如果有記者真係做咗北京唔鍾意嘅事，只要佢做嘅嘢喺香港唔構成犯法，喺雙重犯罪原則嘅保障下，有關記者根本唔可能被本港法庭引渡；到底係「無國界記者」唔了解情況，定係連佢哋畀香港班盲反派誤導咗，真係得佢哋知。觀乎當日記者會嘅坐位，「無國界記者」同盲反派議員甚至記協擺明就企喺同一邊，但咁樣公布、公開法嘅所謂「新聞自由指數」，係咪中立、客觀，相信唔駛廣男講，大家都心中有數！

「收錢冇問題」的組織

講開呢個「無國界記者」組織，廣男上網睇咗啲資料，就有幾件事實在「可圈可點」，包括2005年，「無國界記者」嘅創辦人羅勃·梅納承認，該組織收受美國的金錢，不過佢認為「完全沒有問題」；2006年，美國女記者黛安娜·巴拉赫娜（Diana Barahona）經過長期調查指出，「無國界記者」接受美國國家民主基金會與中央情報局的供養；2012年3月8日，聯合國教科文組織撤除其參與資格，認為其「工作方式」令人質疑並違反新聞倫理。講到呢度，相信大家都明白呢個到底係咩組織，佢哋係咪專幫美國做嘢？你懂的！

原圖：rthk