自從《生果報》評論員李怡以「報應」詆毁已離世嘅全國人大代表王敏剛之後，坊間對《生果報》嘅操守非常質疑，有意見甚至認為讀者、廣告商都應該杯葛傷風敗德嘅《生果報》；而廣告看似「越嚟越少」嘅《生果報》，近期就得到盲反派嘅「大力支持」，繼早前社民連吳文遠眾籌喺《生果報》登頭版廣告攻訐前特首梁振英之後，今日又有「民主黨朋友」喺《生果報》登全版廣告，內容亦都係關於梁振英。囍雨就覺得，當《生果報》嘅廣告三番四次變成政治攻訐嘅工具嘅時候，廣告已經變成唔似廣告，咁其他廣告商仲喺《生果報》落廣告嘅話，會唔會有反效果呢？

又關林卓廷事？

對於《生果報》再現政治攻訐式嘅廣告，民主黨噚日已經喺Facebook預告，話《生果報》今日會有全版廣告，民主黨立法會議員林卓廷仲話，今次廣告係佢一位唔屬於公眾人物嘅「朋友」落嘅；今日民主黨Facebook亦有分享相關廣告，仲有「喜與為伍」嘅Hashtag。到底呢個廣告係民主黨自己落，定真係佢哋啲「朋友」落，大家就不得而知啦，但有樣嘢囍雨可以肯定嘅，就係《生果報》平時嘅報道、評論內容已經偏頗，而家連廣告都充滿政治意味，其他廣告商見到，分分鐘敬而遠之！

可能盲反派人士認為，《生果報》作為盲反派最有力嘅喉舌，佢哋點都要「支持」下《生果報》，不過囍雨覺得佢哋咁樣做，極可能賠了夫人又折兵。大家諗下，點解《生果報》嘅廣告好似越嚟越少咁，原因好簡單，就係因為佢哋報道、評論立場好有問題，一時歌頌罪犯，一時散播仇恨，一時又攞死人嚟講笑，本身已經嚇走唔少廣告商；時到如今，連本來較為唔相關嘅廣告位都畀盲反派變埋做政治攻訐嘅工具，即係成份《生果報》裡裡外外都係政治攻擊其他人，如果廣告商仲喺《生果報》落廣告，好容易畀人誤會，有關廣告會唔會有其他意思呢？

狼狽為奸的「喜與為伍」

至於民主黨話「喜與為伍」，意指樂意同《生果報》「同行」，囍雨覺得就算唔駛佢哋講，大家都知架啦！《生果報》傷風敗德，甚至販賣他人私隱，民主黨人直頭犯法或者涉嫌犯法，遠啲嘅有林子健自編自導自演「釘書釘」事件而被告報假案罪成，近啲嘅有立法會議員許智峯公然喺立法會搶嘢被告，佢哋唔單止「喜與為伍」，直頭係狼狽為奸啦！

原圖: 文匯報