喺一個關於《逃犯條例》修訂嘅會議上面，因為畀人話一句「唔好扮垃圾」，主持會議嘅盲反派最資深立法會議員涂謹申覺得被「冒犯」，所以就請講出呢番話嘅立法會議員郭偉强離場；廣男覺得有啲奇怪，如果郭偉强話「你係垃圾」，咁擺明話涂謹申係「垃圾」，咁就冒犯啫，但郭偉强嘅意思，好明顯係（你係最資深議員，你識規矩嘅）所以「唔好扮垃圾」，咁點睇都係肯定緊涂謹申嘅能力喎，何來冒犯呢？更重要嘅係，涂謹申作為會議「主持」，責任基本上只係協助選出委員會主席，佢作出咁多裁決例如趕人走，又或者「協助」盲反派「拉布」，係咪有權咁做，或者係咪妥當，廣男都相當有疑問。

一切源於盲反派「拉布」

之所以出現「唔好扮垃圾」論，係因為立法會有關審議《逃犯條例》修訂嘅委員會噚日開會，會議先由最資深嘅議員涂謹申主持，需要選出委員會主席，涂謹申喺確認名單時六十多個議員名逐個讀，盲反派議員就住人名「讀法」喺度「拉布」一輪，跟住其他盲反派議員又提出其他質疑，搞到建制派議員不滿，郭偉强就爆咗一句「唔好扮垃圾，畀番少少尊嚴自己」，覺得被冒犯嘅涂謹申於是就請郭偉强離開會議廳喇。

對於涂謹申話自己畀人冒犯，廣男對「唔好扮垃圾」呢句話諗咗好耐，到底有咩冒犯到涂謹申呢？如果郭偉强直指涂謹申係「垃圾」，咁就一定係冒犯啦，但郭偉强好明顯就唔係咁嘅意思，涂謹申明顯係太敏感喇！更重要嘅係，涂謹申作為會議主持，基本上責任得一個，就係主持會議、盡快選出委員會主席，令委員會審議工作可以開展落去，而家佢同班盲反派議員喺度扯貓尾，擺明就係借主持之名「拉布」，真係枉為立法會最資深議員！

盲反派有違公義

郭偉强已經去信議事規則委員會，討論法案委員會或事務委員會主持人嘅產生方法，當中係咪有修改空間，因為而家由資深議員擔任主持嘅做法，已經出咗問題。廣男就覺得，如果涂謹申繼續「玩嘢」，修改法案委員會或者事務委員會主持人嘅方法，實在無可避免要修改，以免盲反派利用漏洞去「拉布」。

原圖: RTHK