記協（香港記者協會）向來偏幫盲反派，親盲反派記者「有事」，佢哋就好緊張，調番轉如果係非盲反派記者諸如網媒記者有事，想佢哋回應？過幾日再講啦！近日，記協就發布一個由港大民意研究計劃幫佢哋做嘅「新聞自由」調查，內容包括近七成公眾受訪者認為政府拒為外國記者會（FCC）副主席馬凱工作簽證續期「損害新聞自由」。囍雨極度唔同意有關說法，因為馬凱工作簽證不獲續期，與新聞自由完全無關。

馬凱「搭台」讓「港獨」份子宣傳

呢個由記協委託港大做嘅民調，對於佢抽樣或者設計，囍雨無大意見，但係啲人認為馬凱事件影響或者損害新聞自由，囍雨就唔同意喇。當中原因好簡單，馬凱並唔係因為採訪或者寫咗一啲新聞故事而不獲續簽證！雖然政府按慣例無交待拒續馬凱簽證嘅理由，但坊間普遍估計，馬凱不獲簽證，係因為佢作為一個記者組織負責人之一，竟然搭個台等「港獨」份子可以向全世界媒體宣揚「港獨」！

大家可以諗下，當日有份出席陳浩天播「獨」午餐會嘅外國記者，有冇邊個之後想續簽證失敗？答案係大家都見唔到！馬凱如果係採訪新聞而被拒續簽證，或者仲可以話同新聞自由有關，但而家一個組織負責人用政府地方搭個台畀人宣揚「港獨」、分裂中國，情況就等同一個外國人喺度幫手宣揚違法主張一樣，相信就算係其他地方，當地政府都未必會咁寬容，忍受到呢啲外國人喺度「興波作浪」呀？

「港獨」紅線清晰

其實喺陳浩天到FCC演講、宣揚「港獨」前，社會各界人士甚至外交部駐港特派員工署都講到明反對FCC邀請陳浩天播「獨」，FCC以至馬凱明知而仲要踩「港獨」紅線，點解特區政府仲要畀呢啲組織負責人續簽證呢？即係香港係開放社會，要開放到其他人嚟幫手宣揚違法主張都要歡迎？至於記協，既然佢哋咁關心外國人，甚至連做民調都要提及馬凱，點解佢又唔關心下疑被傳媒老闆恐嚇嘅香港記者呢？唔通外國人或者外國記者「高人一等」，佢哋要優先「協助」？

原圖:   RTHK