囍雨知道喺呢個「全城熱話」蓋過一切嘅時刻，基本上寫咩、講咩都好難吸引注意，但囍雨今日見到一單幾有趣嘅港聞，實在不得不喺度分享下感受，事緣民陣今年想喺維園搞七一遊行繼續被「截糊」，民陣就估計並批評建制人士「假借慈善團體之名，惡意入紙申請維園足球場，阻止民陣進行7.1大遊行起步之用」；睇完呢段說話，囍雨第一個反應就係，乜個球場係民陣架？難道搞政治嘢，其他團體就要讓路畀民陣優先使用球場？

球場是大家的

對於咩團體喺七月一日借咗維園足球場，囍雨暫時就唔知喇，但如果情況同上年一樣，係有註冊慈善團體借嘅話，咁肯定無問題喇，點解咁講？因為康文署按機制考慮同審批申請嘅時候，會按《免費設施的預訂程序》列明團體的優先次序，如果係慈善團體申請，的確係享有較優先嘅租用權。換句話說，如果有人想借場搞政治活動，而另一邊廂有慈善團體想搞活動，後者優先係正常嘅！

故此，民陣估計、批評建制派「惡意入紙」、「阻止民陣」呢啲說法，基本上係唔駛理嘅，一來如果真係有慈善團體申請場地，人哋優先使用合法、合理；二來，維園足球場係公家地方，唔係屬於一個政治團體，更加唔係屬於某個政治陣營嘅，民陣申請唔到場地，根本就唔應該諉過於其他人或者其他團體。

又係宣傳？

每年嘅七一遊行，民陣事前定必用盡各種辦法宣傳，上年佢哋申請唔到喺維園足球場起步，跟住就放風話要叫唔同團體喺唔同地方集結、「打游擊」，大有一種「公民抗命」式起步嘅感覺。今年佢哋借唔到場，即刻喺網上開Post攻擊定建制派先，其實說穿了，都係宣傳嚟啫！可以預計得到，佢哋嚟緊將會就遊行事宜嘅一切包括起步點、遊行方式炒作一輪，然後再借《逃犯條例》修訂、「佔中」九犯案等議題「炒埋一碟」，力谷市民上街反政府。不過，市民睇盲反派嘅把戲都睇咗咁多年，真係唔知仲有幾多人會身體力行，行出嚟支持成日「關鍵缺席」嘅盲反派呢？

原圖：文匯報