盲反派畀中聯辦主任不點名批評佢哋同反華政客同組織一齊，極力唱衰香港，「議會陣線」立法會議員朱凱廸作出回應，話「王志民嘅講法正正說明要多做呢啲工作」，並認為加強同外國溝通，先可以「捍衛」香港，又稱《逃犯條例》等係香港內政，王志民唔應「干預」。廣男覺得朱凱廸呢番說話相當可笑，法例修訂係香港內部事務唔應該受干預，但盲反派就可以勾結外國政客叫人干預香港，呢個係咩玩法？

朱凱廸歪曲是非

朱凱廸呢番說話，廣男姑且理解為盲反派同外部勢力，包括「台獨」勢力、美國政客勾結呢，就冇問題嘅；但係呢，如果自己國家嘅中央政府以至中聯辦想就香港問題發聲呢，咁就係「干預」，就唔得喇！朱凱廸呢番說話，好明顯就係「只許勾結外部，不許中央發聲」嘅「港獨」思維！

作為中華人民共和國香港特別政政區嘅立法會議員，廣男非常質疑，究竟佢知唔知香港喺咩位置嘅呢？《基本法》除咗寫明香港係國家不可分離嘅一部分，仲講明香港係「直轄」於中央政府，點解中央、中聯辦唔可以發聲？發聲就等於干預？而家王志民講緊嘅，係有退休公務員、立法會議員去美國唱衰香港，出賣自己嘅地方、國家，唔通要「默不作聲」，先叫妥當？如果中央完全唔理香港，係咪即係搞變相「港獨」先？

又想播「獨」？

朱凱廸呢番言論，又令廣男諗起朱凱廸呢個「出名」嘅本土派政客，喺2016年立法會選舉前為咗聲援被DQ嘅陳浩天，就同「香港眾志」等發表聯合聲明，講明支持「民主自決」，而且係有「港獨」選項嘅「自決」；大家要問下朱凱廸，佢咁排拒中央、想搞分割仲要咁「擁抱」外部勢力，係咪想借「自決」推動「港獨」？如果係嘅咪講出嚟囉，唔好為咗個議席收收埋埋咁「辛苦」喇！

原圖: 大公報