講到「許智峯」，你會諗到咩？囍雨依家聽親呢三個字，腦海裡面都會諗起搞事、「搶嘢」，因為事實就係，許智峯搶完一單又一單。係啊，你無聽錯啊，因「搶手機」案而仲保釋緊嘅民主黨立法會議員許智峯，噚日又涉嫌喺中西區區議會搞事、搶文件，搞到個會議被迫腰斬。但囍雨覺得更加得人驚嘅係，事後許智峯自己講番件事，只講自己「一直抗議」，對於「搶嘢」部分就隻字不提，嘩！睇嚟佢真係唔覺得自己有問題喎！囍雨真係好好奇，究竟係咩心態促使佢屢屢「犯事」呢？呢啲又係「無畏無懼」嘅「公民抗命」呀？其實，佢仲記唔記得自己係個議員嚟架？下下咁搞事，破壞議會秩序，佢仲適合做議員？民主黨做乜唔出聲嘅？

自己搶嘢  叫他人「唔好再夾硬嚟」

事緣噚日中西區區議會審議活動撥款申請，許智峯就聲稱有在席議員未進行利益申報，跟住就行埋主席李志恒隔離搶文件，仲反客為主咁叫李志恒「唔好再夾硬嚟」。睇番報道，其實當其時，已經有好多人提醒佢「正處保釋期，唔好再搶嘢」，但許就當耳邊風，仲要搶埋現場一個民政處嘅抽籤箱，叫李智恒「請你處理我嘅問題」。囍雨想講，咁嘅「議員」都真係幾可怕喎，只要認為自己提出嘅問題無受到重視，就要搶文件、搶公物，成日開會都搞事，搞到會開唔成，仲要報警處理，諗深一層，畀佢咁搞落去，中西區區議會仲點可以正常運作呢？喺度囍雨要奉勸選民一句，係咪應該認真考慮下，仲投唔投票畀呢位「議員」喇！

其實，話許智峯係議會搞事嘅「慣犯」，應該一啲都唔過分，而且搗亂「花臣」之多，簡直層出不窮、無人能及。對上一次佢係立法會議事廳搞事，就「一吵二鬧三詐癱」；再數遠啲，搶咪、撞人、衝擊保安人員，招招出齊，最「經典」一次，仲帶埋大聲公去區議會，「鬥大聲」唔畀其他人發言。有時囍雨會覺得，其實許智峯係咪精神健康有啲問題呢？好似控制唔到自己咁款！作為議員，仲要係「雙料議員」，應該明白議員要遵守「議事規則」，如果議員議事但唔駛守規則，甚至可以犯法，咁除咗議會運作受影響，社會都會對議會產生壞印象。

民主黨默不作聲？

值得留意嘅，係囍雨好似唔係好覺民主黨有就事件作出回應，係民主黨已經「無眼睇」，定係因為許智峯係佢哋喺港島區唯一嘅立法會議員，所以點都要「保住佢」？老實講，民主黨一向話自己「和平、理性、非暴力」，但佢哋嘅黨員、區議員甚至係立法會議員越玩越暴戾，佢哋為「一時安逸」而唔嚴肅處理許智峯嘅問題，因住因小失大，失去一大批溫和支持者嘅支持，而付上沉重代價呀！

原圖：文匯報