唔知大家記唔記得，喺違法佔領期間，有啲佔領人士用「警犬」、「黑警」等極具侮辱性嘅言辭辱罵警察，搞到「四點鐘」許Sir喺記者會都忍唔住話班同僚畀人話係「黑警」，令佢感到非常心痛。事隔四年有多，九個佔領主事者被法庭裁定罪成，廣男覺得呢個判決還咗社會一個公道之餘，亦係還咗警察一個公道，就如警察隊員佐級協會主席林志偉所言，違法佔領令警察有法不能依，但相信「天網恢恢，疏而不漏」，法庭會作出最合適嘅判刑。

佔領外還有「戰場」

噚日警察隊員佐級協會主席林志偉向會員發信，除咗提及到違法佔領破壞本港法治同人心外，佢提嘅一段往事令廣男印象好深；當年有教育界人士，恃住自己為人師表、學生對佢哋嘅敬畏，竟然公然喺課堂上責難父母係警務人員嘅學生，令小朋友感到恥辱、難堪，呢啲往事佢都而家仍然歷歷在目。

事實上，喺違法佔領期間，警察可以話係事件中嘅最大受害者，佢哋喺佔領區故然「受盡折磨」，一時畀人辱罵，一時畀人包圍，一時畀人衝擊，甚至被一班示威者毆打；最難受嘅係，警察嘅天職係維護法紀，無論喺學堂定日常執行職務，佢哋嘅訓練都係咁。執行職務，維護公義法治，但要受到咁對待？而喺佔領區外，警察、佢哋嘅家人亦受盡壓力，無論係自己做警察抑或家人做警察，隨時都會變成畀其他人針對嘅對象，但大家要反思一個問題，就係佔領人士犯法，警察只係執法，點解佢哋要受到不禮貌、暴力對待甚至係歧視呢？

佔領主事者應向警察道歉

廣男覺得，當一眾違法佔領被告表示「無悔」、「唔怕入獄」以至多謝呢個果個人支持佢哋嘅時候，佢哋有冇諗過，佢哋發起嘅違法佔領行動，令到以萬計嘅警察喺佔領果79日入面受盡痛苦，甚至「禍及家人」？而家法庭裁決佢哋有罪，佢哋係咪應該向警察正式道歉，承認自己對社會造成負面影響之餘，令曾令到警察受到極大困擾？廣男就覺得，佔領事件入面的確係有正義之師係為香港做事，但佢哋唔係破壞社會秩序嘅佔領主事者或者人士，而係一直守護緊香港、維持緊社會秩序嘅香港警察！

原圖:大公報