佔領九罪犯案噚日有裁決，法官裁定九人全部有罪。今日，盲反派元老李柱銘就喺報章撰文，以〈九子犯的是散播希望大罪〉為題，為九犯辯護、「貼金」。對於李柱銘嘅「指定動作」，廣男見慣不怪，但李柱銘喺佢嘅文章裡面，將佔領九罪犯講到係因為追求民主而被政府「打壓、入罪」咁款，將長達79日嘅違法佔領美化為 「散播愛與希望」，對於信口雌黃、顛倒黑白，廣男實在係不能接受！

李柱銘喺文章講到，九罪犯嘅「淪落」，係「建基於一個港人共同的卑微訴求」，就係實現普選，但「回歸以來，這個民主目標被一拖再拖」、「面對港人強烈的民主訴求，中共始終擺出一副寸步不讓的強硬姿態」云云。廣男想講，香港所有合資格選民，原本都有機會喺2017年一人一票選特首，甚至喺未來嘅一兩年「更進一步」。但喺立法會投下反對票、扼殺選民們呢個「卑微訴求」嘅，正正係一班反對派。回歸20年來，究竟咩人阻礙緊香港嘅民主進程？答案一目了然！

散播違法歪風才對

至於李柱銘話佔領九罪犯嘅罪名係「散播希望」，廣男覺得李柱銘完全係將啲嘢調轉嚟講，自從違法佔領之後，盲反派人士、佢哋嘅支持者甚至部份青年嘅守法意識變薄弱，好似有嘢就可以訴諸衝擊甚至暴力嚟解決咁，議會內連立法會議員、前立法會議員都將議事廳變成「抗爭廳」。議會外最嚴重果單，甚至有「港獨」派青年走上街頭搞暴動，攞磚頭掟警察，甚至當警察係「人肉沙包」係咁打，仲要破壞公物加燒車。大家真係要問下李柱銘，呢啲係咩「希望」，點樣「愛與和平」法呀？

李柱銘會叫兒子散播「希望」嗎？

見到咁多後生仔女因為盲反派政客口中嘅「違法達義」歪風而以身試法，廣男就諗起李柱銘果位做咗大律師、娶埋有錢女嘅公子；既然戴耀廷等人所散播嘅係「希望」，廣男真係想問下李柱銘，佢有冇將呢種「希望」灌輸畀自己啲子女或者子侄，叫佢哋迎接、一齊散播下「希望」呢？廣男估就未必有喇，又難怪嘅，衝衝撞撞，打打殺殺，梗係留畀其他人嘅仔女做啦，自己啲子女、子侄，最緊要係前程似錦嘛，李柱銘為子女「著想」嘅心態，明白嘅！

原圖：rthk