佔領九被告罪成，法庭嘅判決可以話係還咗社會一個公道，因為喺「違法佔領」期間實在有太多無辜市民受到影響，如果畀九被告脫罪，咁就係不公不義；但向來「輸打贏要」、但聲稱過會承擔罪責嘅盲反派人士，似乎連依法辦事嘅法庭同政府都唔放過，係咁「發炮」，一時話政府「可恥」，一時又話政府「報復」云云。囍雨實在好奇，一班人明知而違法，政府依法辦事，關報復咩事？佢哋言下之意，係咪要政府見到有人犯法而「不作為」先叫啱呢？

攻訐政府 破壞法治

要數盲反派嘅謬論，實在太多太多，不能盡錄，囍雨只能夠揀其中一部分作回應。例如佔領九被告罪成，二十幾個盲反派議員就發表聯署聲明，話當權者應「引以為恥」，批評政府以過時嘅控罪提控，係用司法手段作「政治報復」；身為資深大律師嘅梁家傑，更進一步話政府用刑責較重嘅普通法檢控，係「寸土必爭，攞到最盡」，長遠會製造白色恐怖及寒蟬效應。綜觀盲反派嘅論述，就係政府「錯晒」囉！

對於盲反派一番言論，囍雨首先要問一句，佔領九被告確實係犯咗事，而且佢哋事先已經知道甚至揚言呢場係違法行動，咁當佢哋將違法行動付諸實行，而之後被告、被定罪，政府以至檢控部門都係依法辦事，關報復咩事呢？即係想政府因為政客有特定政見，就唔告佢哋，等佢哋畀其他人「更平等」？至於梁家傑嘅說法，除咗係侮辱政府，更加係侮辱緊法庭，因為法庭早已表明相關罪行適用喺香港，冇違憲而且喺普通法存在，大家要反問梁家傑一句，檢控部門告咩罪，駛唔駛先徵詢盲反派意見？用另一角度睇，違法佔領搞到成個社會運作嚴重受阻兩個幾月，政府點解要告條輕好多嘅罪，為盲反派度身訂造「輕鬆控罪」呢？

輸打贏要的政客

今次案件其實好簡單，就係有人犯法繼而被告然後罪成，如果盲反派班人唔想「找數」，最簡單嘅方法就係唔好犯法；佢哋打晒開口牌話自己會犯法，甚至去埋警署自首，搞一大輪大龍鳳，最後畀人告果時原來可以話控罪太重所以「唔認數」，係咪即係當法庭係自助餐廳，要食咩飲咩可以「隨便揀」呢？如果涉案被告坦然「找數」，唔好諸多藉口，或者仲值得人尊重番佢哋有少少風骨，但而家呢種「輸打贏要」嘅做法，其實好肉酸囉！

原圖：ＲＴＨＫ