擾攘多時嘅違法佔領九疑犯案終於有判決，包括違法佔領發起人戴耀廷、陳健民同朱耀明等九人全部罪成，法官喺作出判決時清楚點出，雖然香港社會接受「公民抗命」概念，但「公民抗命」並唔係刑事檢控嘅辯護理由，又直指「佔領三人組」達成協議發起「佔中」，相關阻礙既不合理，亦無法可依，所以裁定三子罪成。囍雨覺得，今次法庭嘅判決可以話係還咗香港社會一個公道，因為無論有咩堂而皇之、理念崇高嘅理由，都唔應犯法，唔應該影響數以百萬計嘅無辜市民！

佔領日子 不堪回首

違法佔領嘅概念起源於戴耀廷喺2013年1月寫嘅一篇文章，之後以戴耀廷、陳健民以及朱耀明為首嘅盲反派人士，用超過一年時間散播「違法達義」嘅訊息，當社會有啲人認為戴耀廷等人「書生論政，一事無成」之際，違法佔領行動就喺2014年9月28日由戴耀廷等人啟動，直至同年12月15日結束。喺呢79日期間，香港好多主要交通幹道被非法佔領，除咗市民、商戶苦不堪言之外，警察更加成為整場違法行動嘅磨心，畀人辱罵、包圍甚至毆打時而有之，囍雨真係想盲反派一句，如果犯完法、影響到咁多人都唔駛「找數」，咁香港仲有法治可言？

值得留意嘅，係一班發起違法佔領嘅盲反派，雖然曾經口口聲聲講過佢哋係違法佔領後會「承擔罪責」，但由佢哋被起訴到上庭，呢啲承諾過會「找數」、頭頂有「光環」嘅政客，係全部都唔認罪，甚至揚言如果敗訴會上訴；呢度衍生咗一個好大嘅道德問題，就係當初佢哋煽動其他市民一齊去犯法果時，講到明係要認罪、承擔罪責以完成「公民抗命」最後一步，但係當其他涉事者都被定罪甚至被判監嘅時候，呢班政客先話自己會「走數」，咁即係用道德理由煽動完其他人犯法，但自己就想「逃之夭夭」，囍雨只能夠講句，犯法缺德，犯法後「走數」、卸膊就更缺德！

法庭判決釋出正面訊息

今次法庭依法判九個被告有罪，囍雨認為正好向社會甚至全世界釋出正面訊息，無論政客有咩理由，姑勿論係爭取普選抑或其他訴求都好，呢啲都唔係犯法後可以抗辯嘅理由。所以，如果日後再有政客煽動他人違法，然後講到理念好似好崇高，大家一定要明白，啲政客唔係送人去康莊大道，而只係推人做「爛頭卒」；經歷違法佔領、旺角暴動事件，囍雨希望社會大眾尤其係青年要「帶眼識人」！

原圖: RTHK